香港股市 將在 5 小時 46 分鐘 開市

我放棄 $ 68,000人工 辭職去台灣住咗2年

職場

文 : 不覊

香港係我愛的地方,但愈來愈心淡,好似人人壓力大到就快爆咁款。我係教書佬一名,教咗20幾年書,人工$68,730,好多人都話我人工高假期多,又做咗咁多年,乜都上晒手啦。而且教咗咁多年,唔似啲新仔年年做TEMP,睇唔到前景。

延伸閱讀:

後生仔有使命帶活動 中學畢業人工$11,534

免費資源 8款精美聖誕PPT X 10個高質免費圖庫

無錯,我係人工高,而且在同一間中學教咗咁耐,有一定勢力,而且講書呢家野,良心事業,有時候真係呢埋對眼都識講。

你以為真係咁筍?其實有苦自己知,教書其實壓力好大,學生問題好多,尤其近年學校愈收愈多SEN仔,我哋學校就差不多有兩成SEN仔。

(圖片來源:AFP)

做教書佬咁多年,雖則係冇咗昔日的熱情,但我都算係一個人嚟,對住啲SEN仔同家長,我都好明白佢個哋苦況,但當你響同一班多幾個,我人就得一個,真係搞唔掂。

再加埋校長又好大喜功,教學工作之餘,仲要兼埋啲橆無謂應酬,搞活動參加比賽攞威,真係瞓街都唔掂。

(圖片來源:AFP)

去到一個地埗,一到返學我就成面爆瘡,但唔知點解,一放假就自動好返。最終,我唔係要睇皮膚科專科醫生,而係要睇心理醫生,話我有 DEPRESS 喎,係不知不覺間發生,我真係去到一個爆煲點。雖然人工有 $ 68,730,雖然響呢行廿幾年,係好難取捨﹐但我最終都做咗呢個決定。

就係我 唔 撈 了 !!

呢幾年好在唔係大花筒,加埋啲公積金,加上單身寡仔,我決定出走我最鍾意的台中生活。租間屋仔都只係幾千蚊港紙,有時間就睇吓書,去郊外行吓,唔經唔覺就兩年了。

家陣我先發覺自己係生活,以往響香港只係為咗生存。

近年愈來愈多人選擇移居台灣,以下這位90後便為一例。

作為一個九十後,真係對香港好失望。尤其係呢個特首選舉完咗之後,更加唔敢想像之後五年民意仲有咩地位、會幾咁難捱。。。加上喺香港,唔好話實現自己嘅創業夢,本身呢幾年搵工都已經夠難,要搵份似係人做嘅工仲難,個個老細都唔係人嚟,工時本身都夠晒長但仲逼人開OT、香港啲顧客又零舍麻煩,但又得嗰雞碎咁多錢追極都追唔到通脹。。。

(圖片來源:AFP)

揸住張沙紙都唔知有咩用,讀過書都賺得唔夠洗碗多,好絕望,喺香港,真係睇唔到自己有咩正面嘅將來,真係好想好想好想走去台灣唔返嚟。。。

欣賞當地醫療 溫柔又貼心

特別喺小圈子個結果出咗嚟之後,我更加積極搵吓啲移民資料。睇過歐美各國,個個都要百幾二百萬咁,心諗唔通真係走投無路?但又突然醒起我仲未睇吓近水樓台嘅台灣移民資料,睇完,當堂令我覺得呢個世界充滿希望!

去過台灣旅行兩次嘅經驗話我知,嗰度嘅生活節奏比香港舒服好多唔洗趕頭趕命,而最緊要嘅係,體驗過當地嘅醫療服務後,更加覺得台灣人真係溫柔又貼心好多。嗰次入院睇急症,唔洗等十幾個鐘,而且醫生護士都好溫柔,直頭有種重返童年畀人照顧嘅感覺。我覺得,病嘅時候係要需要有人呵護吓自己,但喺香港睇親醫生都黑口黑臉,燒到百幾度都當你呃佢醫生紙咁嘅臉口,入醫院又畀人呼呼喝喝咁。病人啫,犯法啊?

移民申請三個月搞掂

對於情竇待開嘅一眾港男嚟講,台灣真係一片福地。嗱我唔係話港女差,不過就真係比台妹比下去囉。台妹識打扮又識哄人,而且又特別鍾意我哋啲港男,作為港產小毒毒嘅我喺一班台妹眼中竟然可以一嚐做搶手貨嘅滋味,一直令我對呢個地方好迷戀。。。

同埋移民過台灣真係快靚正,移民申請快到三個月就搞得掂,唔似美帝咁玩你十幾廿年後嚟個特朗普,又無了期咁等落去唔知等到幾時。

第一步:去台灣讀碩士!

我本身已經大學畢業咗成年,如果我去台灣讀埋個碩士,畢業後住夠五年,最近1年喺台灣平均月賺夠一萬港紙就可以定居。其實呢個方法幾吸引,但係無啦啦走去讀個碩士我又唔係好想。不過總算畀我見到另一個方法係我比較有興趣嘅。

(圖片來源:AFP)

其實我一直都有個夢想係想開間cafe,如果想長期做生意,只要創業基金有最低50萬台幣就可以拎到台灣嘅創業家簽證,每年通過當局查核,做夠5年,每年住夠183日,就可以入籍,呢個方法真係好吸引!一來個本唔係好多,但又可以畀我發吓創業夢喎!

最嚮往:綿羊仔代步

而且我又好鍾意揸電單車,有啲台灣朋友同我講,台灣之所以周圍都係綿羊仔,就係因為油費夠晒平,揸足成個月都唔洗一舊水港紙!咁又可以完咗我個車主夢!同埋喺台灣啲樓平香港幾倍,同一個價錢,喺香港屈間百幾呎劏房嘅時候,已經可以喺台北買到千幾呎單位,想像吓呢一個將來係幾咁美好?做老闆、做業主、做車主、畀女圍、做自己想做嘅嘢、擁有自己想要嘅嘢、過啲輕鬆嘅生活。。。。。。

(圖片來源:AFP)

依家開始努力儲筆錢,目標喺林太卸任前走佬!

 

Fresh Grad 最怕遇上 7種最難頂的同事

成功人士特質 學識5小時法則

延伸閱讀:

的士司機職場事 下次真係唔好飲咁多酒