雅虎香港財經 
【扮工收風】上司請welcome lunch 但又Claim公數
雖然好唔人道，但人在高位，見到新同事第一日返工，請晒全team食welcome lunch可以話係天經地義，最多平有平食、貴有貴食。不過有朋友公司返咗三個月工嘅上司似乎「姑寒得來又想扮闊綽」，佢自己親自請返來嘅新同事第一日返工，就一次過約晒全team十個同事去飲茶，當係歡迎新同事。
去到酒樓，即刻叫同事隨便嗌，welcome lunch佢請。咁同事聽到仲唔搏命食咩，有燉湯叫燉湯、有特點叫特點、有特色小菜叫特色小菜，食到飽上心口。
埋單一睇，嘩！食咗成3千幾蚊，上司即刻面色一沉，然後補一句：「食完呢餐飯就俾心機做嘢喇！」 點知返到office，「手指拗出唔拗入」嘅秘書忍唔住爆響口：
「佢頭先拎住張單問我，同事welcome lunch有冇得claim公數？」
秘書自言聽到時都呆一呆，然後禮貌答一句：「根據公司政策，同事食飯係冇得claim。」
點知上司死唔罷休，再問：「咁如果當係team building呢？」
咁嘅原因都諗到，秘書真係想寫個服字，但秘書亦唔係省油的燈，再答：「team building嘅budget要一早問CEO拎Approval…」
上司為咗易落台，唯有最後補多句：「我以前間公司係有的，呢度連果少少錢都唔肯俾，唔怪得留唔到人啦！」
小編覺得，其實與其請得咁唔情願，不如一早同同事講AA制，好過請完之後又後悔啦。
===================
19網輕鬆爆料熱線，歡迎舉報老細同事19惡行，立即click入去講畀我哋知啦
