香港股市 將收市,收市時間:4 小時 52 分鐘

【扮工收風】大機構HR主管自己升自己職

HR係一間公司最大勢力的部門,呢個形容一啲都冇錯。最近聽到有大機構的HR部門主管,因為接咗老闆Order,要負責重整公司各個部門的人手架構,竟然乘勢幫自己升職,令一眾公司同事為之驚訝。

由於每個部門架構原本唔統一,HR部門主管於是寫建議書,建議所有部門都要跟某「得寵」部門一樣,增設行政總監職位,HR主管唔想只係為他人作嫁衣裳,當然都要幫自己謀福利,所以建議HR部門都一樣要增添行政總監職位,仲順理成章將自己升Level,由主管升職做行政總監,人工加咗一大截,假期同員工津貼都比做主管果陣豐厚咗。

不過做得出就預咗俾人講,首先佢自己有職升,但就唔益下屬,竟然對外重新招聘主管一樣,下面一直等緊升的經理自然唔Gur,於是周圍講佢壞話,唱佢自己升自己職。

其實部門的老闆亦敢怒不敢言,個個唔服氣都唔敢出聲,因為佢哋都知道HR唔得罪得。

究竟係乜類型的公司的HR咁大支嘢、咁獨立王國?當然就係不斷擴張緊、不斷請緊人的大機構啦,公司食粥食飯都睇HR頭,而HR又氹得掂老闆、講到明會幫老闆cut staff cost,試問老闆點會唔領情先!

===================

19網輕鬆爆料熱線,歡迎舉報老細同事19惡行,立即click入去講畀我哋知啦