【扮工收風】收工後上司奪命追魂
呢個世界有好多種風格嘅上司,其中一種令人頂唔順嘅,一定係性格急急子上司,同佢哋做嘢真係好考耐性。
朋友面對嘅正正係呢個情況。聽佢形容,話有一晚佢上司無啦啦,星期六醒起星期一要幫管理層影相,於是星期六奪命追魂call俾下屬。
咁啱下屬睇緊concert,於是唔為意無聽電話,結果一睇完concert收到30幾個missed call。打返俾上司,佢竟然係想叫下屬星期日問定攝影師拎quotation,星期一一朝早俾佢approve,等下晝可以影相,下屬嬲到講咗十萬句粗口。
又有一次上司whatsapp下屬group,講緊係放工時間,但隔咗一分鐘仲未有人覆,於是追問大家喺邊,問點解冇人覆佢。後來有人話自己去咗沖涼,上司竟然再問:「點解沖涼沖咁耐?」下屬完全無言。
所以人生最怕遇到呢類chur過另一半嘅上司,希望新一年,大家都可以有個好上司啦。
===================
19網輕鬆爆料熱線,歡迎舉報老細同事19惡行,立即click入去講畀我哋知啦