【扮工收風】霸氣老闆逼員工銷假退機票
各位打工仔以為一早請定大假、講明去長假、連機票都買埋就好穩陣?包保個trip實食無癡牙?咁你就大錯特錯。小編識得有打工仔最近就俾老闆強制要求銷假,就算買晒機票,都話要cancel,無情講。
原因係公司好多活動因為社會氣氛而延期,明明9月搞,又突然延到去12月先搞,因為唔想部門剩咁多budget,下年大條道理俾人cut數,所以就算係閉門活動,都想要搞咗先。
但有同事一早就請晒12月兩星期大假,完全撞晒preparation同活動時間,所以老闆直情想佢銷假,甚至開到聲要佢改機票,再唔係索性放棄張機票。
言談間仲暗示同事其實冇得揀,因為講到公司都想開源節流,所以一係銷假、一係遞信。同事聽到都好無癮。
鬼咩,人工擺明冇得加、花紅擺明凍過水,依家連假都唔俾放,打工仔點會唔灰到爆呢?
===================
19網輕鬆爆料熱線,歡迎舉報老細同事19惡行,立即click入去講畀我哋知啦