雅虎香港財經 操盤手札記│定存畀4厘 銀行點計數？（割柑人）
兩個消息逆轉市況！其一，上周五美股開市前，聯儲局「聽風者」——《華爾街日報》記者Nick Timiraos收風後放風，指儲局11月議息將會討論12月應否放慢加息步伐；其二，據報日本再度出手干預滙價。於是，美國10年期債息由即市高見4.338厘轉為低見4.2厘，收4.219厘；美滙指數由升0.9%轉為跌0.9%，收111.88；美股三大指數則喺連跌3日後反彈2.3%至2.5%，港股ADR比例指數高水225點或1.4%。
美股外幣即時報價 多國新聞任睇
上周五晚，日圓滙價低見151.95兌1美元，跌1.2%，再創32年新低；但個半小時內，由低位抽上146.22，抽升3.9%。據《日經新聞》、《路透》分別引述消息稱，日本政府入市干預，沽美元買日圓捍衛滙價，係繼9月22日後，一個月內再度出手；不過，日本財務省拒作評論。市場估計，日圓逼近152關口之際，日本政府趁有聯儲局拖慢加息風聲，乘機入市干預，以收更大功效。
日本捍滙 渡邊太太對着幹
日圓持續貶值，皆因美日幣策背馳、息差擴大，咁亦增加套利交易誘因，吸引「渡邊太太」（Mrs. Watanabe，泛指日本炒滙散戶）參與交易。據日本金融期貨交易業協會（FFAJ）數據，9月日本外滙交易中，日圓兌美元交易額達1,098萬億日圓，首度突破1,000萬億，按年增2.8倍，創單月新高，規模媲美銀行間貨幣交易規模。渡邊太太同財務省對着幹，令財務省捍衛圓滙難度增加。
香港有別於日本，港元同美元掛鈎，未致大貶值；但美國連番加息，亦因息差擴大，資金流出港元。香港銀行體系結餘減少，港元銀行同業拆息上升，上周五3個月期報4.2421厘，半年期報4.6373厘，1年期更突破5厘，報5.0637厘，創16年新高。值得注意嘅係，以拆息計，3個月、半年、1年期港美息差已分別收窄至約0.1、0.2、0.4厘。以最優惠利率計，港美息差則約0.9厘。
英鎊危機 滙豐較渣打更傷
銀行同業拆息係銀行間互相借貸嘅利率，一般係存款額多嘅大銀行借錢畀中、小銀行。本港拆息持續上升，難怪近排大、中、小銀行都推出年息接近4厘或以上嘅定期存款搶「平錢」。對中、小銀行嚟講，若以低於4厘息攞到1年期存款，就唔使以高於4厘息向大銀行借錢；對大銀行嚟講，若以低於4厘息攞到1年期存款，則會以高於4厘息借錢畀中、小銀行。
本港大銀行，以3間發鈔行——滙豐（005）、中銀（2388）、渣打（2888）存款額較多，較能受惠拆息上升，呢個利好因素，可望喺明春公布嘅今年全年業績反映。然而，要留意係，滙豐、渣打屬英資銀行，喺英國有業務同資產，今年以嚟英鎊兌美元已貶值16.5%；上周英揆下台、英鎊危機未除，潛在影響不容忽視。而據瑞銀、花旗估算，英鎊貶值，滙豐所受影響較渣打大。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
