雅虎香港財經 操盤手札記│擬免港股通股息稅 受惠股盤點（割柑人）
過去3個星期，扣除五一勞動節假期嘅14個交易日，港股連升10日後回調2日再升2日，由4月19日險守16000關起計，累升2,740點或16.9%，接連突破上年1月以嚟嘅下降通道頂，以及250天牛熊分界線，上周五收18963，直撲19000關。今輪升勢，有指主要原因係資金流入，但究其直接原因卻非如此，資金流入係「果」唔係「因」，「因」係港股基本面發生變化，吸引資金流入，而資金帶嚟上升動力。
美股外幣即時報價 多國新聞任睇
港股今輪升勢 政策帶動
今輪升勢，主要由政策帶動：4月19日，中證監發布5項資本市場對港合作措施，包括支持人民幣股票交易櫃台納入「港股通」；4月23日，《人民日報》刊文「堅持深化金融供給側結構性改革——學習《習近平關於金融工作論述摘編》」，即支持喺央行公開市場操作中逐步增加國債買賣；4月30日，政治局終於拍板7月召開三中全會（較往常遲了10個月），涉及經濟社會改革重大舉措；5月9日，據《彭博社》消息，中證監、國稅局正考慮豁免內地散戶經「港股通」投資港股嘅股息稅。
港股由跑輸全球，近月變成跑贏全球，今季迄今累升14.6%，今年迄今累升11.2%；不過，市場普遍預期短期將會回調。投資者喺關注港股嘅同時，亦宜關注日韓股市及其成交變化，之前日韓股市回落，資金流入港股，如果日韓股市以大成交上升，則或啟示港股需要先行回調。資金往往逐利，能夠迅速轉到有表現嘅市場。睇走勢圖，恒指喺18300至18600完成整固，上周五向上突破，開始回補上年8月下跌裂口18800至19000，頭肩底量度目標19500，若先行回調，首個支持睇18600。
再引北水南下 利港交所
講返港股最新催化劑——傳中國考慮免收「港股通」股息稅，現時北水經「港股通」投資港股所得股息，需付20%個人所得稅，若為紅籌股，例如中移動（0941.HK）、中海油（0883.HK），喺20%稅率以外，需額外再付10%企業所得稅，總計28%；然而，投資A股只需持有滿1年即可免收股息稅，大大削弱港股嘅低估值優勢。AH股長期有30%以上差價，正係反映股息稅（20%至28%）嗰部份。中金發表報告，若消息屬實，有助提高港股高息股嘅吸引力、改善港股市場流動性、收窄AH股差價。睇返過去3年嘅《彭博社》消息，命中率頗高。
免收「港股通」股息稅，有乜嘢受惠股？主要有四：
①收息股，尤其現時北水要畀28%股息稅嘅紅籌股；
②港交所（0388.HK），摩通發表報告，指若落實，有利港股交投，以30天移動平均線計，港股日均成交額1,150億元，同10年水平即1,060億元相若，若成交額升1個標準差至1,410億元，將對港交所每股盈利有11%影響；
③銀行股，由於H股同A股嘅稅後收益率差距將擴大，有利銀行股，尤其建行（0939.HK），其A股股息率5.7厘，H股8.3厘，差距達2.6厘，四大內銀中最闊，農行（1288.HK）、中行（3988.HK）、工行 （1398.HK）分別只差1.8厘、1.8厘、1.9厘；
④券商股，尤其喺港股交易量佔比較高嘅中金（3908.HK）、華泰證券（6886.HK）、中信証券（6030.HK）。
割柑人
www.fb.com/hkstockpicker
本欄隔周一刊出
