雅虎香港財經 操盤手札記│港府所持港交所 疑似轉倉（割柑人）
踏入7月，下半年嘅開始，先回顧上半年環球主要股市表現。股市指數排行榜三甲係美國納指（+31.73%）、日本日經225（+27.19%）、意大利富時MIB（+19.08%）；包尾、尾二、尾三則係香港恒指（-4.37%）、中國富時A50（-3.96%）、中國滬深300（-0.75%）。喺高息時代，以對息口敏感嘅科技股為主嘅納指，竟然跑贏同儕奪冠，眾多財經專家大跌眼鏡。果然，股市無專家，只有贏家同輸家！
美股外幣即時報價 多國新聞任睇
展望下半年，股市食粥定食飯，要睇息睇水（資金）。上周五，美國聯儲局最睇重嘅通脹指標——PCE（個人消費支出）物價指數，5月數據出爐，PCE按年升3.8%、按月升0.1%，核心PCE按年升4.6%、按月升0.3%，升幅都見放緩兼大致符合預期，核心PCE按年升幅更低過預期；不過，PCE指標仍遠高於儲局嘅2%通脹目標。數據出爐後，利率期貨顯示，市場押注本月加息0.25厘機會為86.8%。
美息傷港股 拖累港交所
美國消費通脹放緩，但商品通脹、服務通脹仍高，加息欲斷難斷，財長耶倫再撐經濟，指「通脹可在不損就業下放緩」、「衰退風險正在下降」。上周五，美股道指、標指、納指分別升0.84%、1.23%、1.45%；金龍中國指數升1.01%；港股ADR比例指數高水120點或0.63%，重上19000關。港股上周五收18916，近日喺18800至19200橫行整固，蓄勢上試19500關；而睇恒指波幅指數升唔上，大跌空間有限。
美國加息未完，衰退風險下降？耶倫係咁睇，街邊執紙皮阿婆就未必咁睇！早前嘉信理財發表報告，指美國正處於「紙箱衰退」，可能導致就業市場走弱，並使企業盈利添壓。經濟衰退通常導致所有經濟環節萎縮，但目前只有製造業同貿易業出現明顯萎縮；而據美國紙箱協會（Fibre Box Association）所講，紙箱需求因而明顯下降。過往美國陷入衰退之前，都曾出現呢個情況。
講返港股，美息高處未算高，一來會令人民幣兌美元貶值，二來即使港元同美元掛鈎，但港美息差誘發大量套息交易，會令資金流出港元，兩者都不利港股；而港股成交縮減，則不利港交所（388）。
花旗轉工行 或政治考量
講到港交所，不得不提作為最大單一股東嘅港府，疑似將所持約6%股份轉倉，由美資花旗轉到中資工商銀行（1398）。中央結算系統（CCASS）顯示，花旗倉位喺6月14日轉出7,850萬股或6.19%港交所，工行倉位則轉入7,800萬股或6.17%（此前倉位只得102萬股），貼近港府持股，以當日收市價計，市值約240億元。其後，工行喺6月27日轉出2,536萬股或2%到同系工銀亞洲證券。
港府喺2007年9月7日曝光增持港交所，由4.41%增至5.88%，同日只有花旗倉位增加相近數量，意味港府或已選用花旗作為託管商16年或以上。港府罕見將持股射倉，若然真箇由美資行轉倉中資行，究竟係政治考量抑或其他考量如券商手續費？斷估唔會好似一般大戶轉倉咁，一係押股借錢，一係上市公司或大股東先舊後新配股；但將持股轉換託管商後再將部分射倉證券行，此舉難免令市場擔心大股東有可能沽貨之嫌。港府對港交所持股有冇乜嘢後着呢？走着瞧吧！
割柑人
www.fb.com/hkstockpicker
本欄隔周一刊出
