雅虎香港財經 操盤手札記│雙料新貴海爾 非季檢大贏家（割柑人）
「鷹王」發功！今年喺美國聯儲局有投票權嘅聖路易斯聯儲銀行行長James Bullard，上周四揚言，加息要加到5至7厘（現為3.75至4厘），先有足夠限制性去遏制通脹。呢個息率「天花板」預期，高過儲局9月點陣圖顯示嘅4.6厘，亦高過市場預期嘅5厘。此前，儲局多名官員已表態支持繼續加息，包括三藩市聯儲銀行行長Mary Daly指要加到4.75至5.25厘。簡言之，加息起碼加多1厘先見頂。
美股外幣即時報價 多國新聞任睇
美滙指數連升兩日，累升0.65%，上周五收106.97；美債孳息1、2、3、5、7、10年期兩日累升約13至16.5點子，上周五分別收4.7487厘、4.5308厘、4.2968厘、4.0085厘、3.9309厘、3.829厘；美股冇畀「鷹王」嚇倒，兩日都變動唔大，上周五道指、標指、納指分別收升0.59%、0.48%、0.01%，不過，反映中概股表現嘅納斯達克金龍中國指數則跌2.98%，港股ADR比例指數低水93點或0.52%。
幾時見底 可睇3個訊號
美股係咪已經見底？喺連番加息、經濟放緩下，市場預期美國企業第四季業績比第三季更差，美股見底言之尚早。據Refinitiv數據，分析師預計標指成分股第四季盈利將減少0.4%，比上月預計將增加5.8%大幅逆轉。上次標指成分股盈利倒退係2020年第三季，因疫情導致供應鏈斷裂。高盛早前調低標指2023年每股盈利預測至0%，瑞信則指盈利預測降幅逾半嚟自息口敏感嘅科技股同相關股份。
美股幾時見底，可睇3個訊號：①失業率——喺熊市中，失業率先起動，然後衰退、通脹回落，而現時職位空缺相對失業比率顯示就業市場仍緊張；②孳息曲線——2年期同10年期國債孳息倒掛約早過衰退13個月（今輪係3月尾首次倒掛），衰退一般要等曲線由趨平轉趨陡先出現，而現時債息倒掛幅度為1981年以嚟最大，莫講話衰退，曲線趨陡都未見；③情緒指標——股市底部常見投降式抛售，市場情緒悲觀，而現時買入認購期權相對認沽期權嘅比例創逾1年新高，未見悲觀。
阿里權重上調 成大贏家
睇返港股，上周恒指三度挑戰18400關受阻，上周五失守18000關，收17992，本周勢將繼續18000關攻防戰，初步支持睇上周一上升裂口17500水平，下一支持睇前周五上升裂口16800水平。留意返，上周五收市後恒指公司季度檢討出爐，恒指納入康師傅（322）、華潤萬象（1209）、海爾智家（6690），12月5日生效。海爾智家同時打入恒指、國指，換馬買盤最多，預計合共12.4億元，本周初炒作染藍升幅或較大。
科網龍頭騰訊（700）、阿里巴巴（9988）、京東（9618）喺恒指嘅權重分別上調至8%（現為7.95%）、7.57%（現為6.96%）、3.33%（現為3.17%）；美團（3690）則下調至6.65%（現為6.82%）。今趟季檢，喺恒指權重達8%上限嘅只得騰訊、友邦（1299），阿里因第二上市計法未達8%，不過，阿里除咗喺恒指權重由6.96%上調至7.57%，喺國指權重亦由7.27%上調至8%，變動生效後，指數基金買盤料達12.7億元，反成今趟季檢大贏家。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
