雅虎香港財經 【林燕玲老公葉浩文疑出軌】「小飛俠」11年前拖已婚才俊龔耀輝酒店密會
今日有報導踢爆，前TVB女主播、人稱「小飛俠」嘅林燕玲(Ruby)，佢任職財經界嘅老公葉浩文（Kirk)同落選港姐周依婷（Phoebe）過從甚密。報導提及葉浩文同周依婷本來係同事，因此關係變得密切，仲經常一齊買早餐、食晏兼齊齊收工走人，即使葉浩文轉工都保持聯絡，影到葉專登過海搵Phoebe食飯，兼且有親密行徑添。據估計，Kirk懷疑喺Ruby陀住BB期間，已經同Phoebe有嘢！
呢單新聞引起唔少網民回帶，諗起11年前林燕玲被周刊影到密會已婚才俊龔耀輝嘅緋聞！
2009年，由TVB過檔NOW做首席財經主播嘅林燕玲，被傳同筆名「方卓如」嘅金融界人士龔耀輝有來往。龔耀輝曾經參加2008年立法會選舉出戰會計界功能組別，喺一次投資講座上認識負責做主持嘅林燕玲，之後財經界開始傳出二人出雙入對嘅消息。有傳媒跟蹤林燕玲多日，發現疑似龔耀輝揸住架跑車接載Ruby返工放工，最爆嘅係目擊一晚收工之後，龔耀輝接Ruby放工後，極速驅車到數碼港一間酒店。
根據當時報導，二人到埗後先睇清楚環境，確定冇熟人喺附近就分頭上房，2個鐘頭後先再次現身。有記者致電酒店，確認龔耀輝當晚有預訂房間的紀錄。後來記者將相片俾龔耀輝太太睇，似乎龔太當時先知老公嘅艷遇。
事後電視台立即安排林燕玲放假，風頭稍過後都只係調派Ruby做外電組翻譯工作，後來索性辭職轉戰金融界，曾於渣打銀行及林建岳旗下麗新集團任職。3年前林燕玲同拍拖一年幾嘅金融界男友葉浩文結婚，今年4月兒子葉星辰出世。
