雅虎香港財經 【歡樂滿東華】藝人危險表演 吳剛飲「滾油」原來出術 梁朝偉食玻璃吞埋落肚
星期六又係一年一度嘅《歡樂滿東華》！以往東華show係TVB台慶以外年度大製作，一線大星例必捧場，仲有唔少藝人負責高難度場面，睇到好緊張。呢幾段，過咗咁多年都仲好有印象︰
吳剛食炭飲滾油
亞視出身嘅吳剛，90年代跳槽TVB，話咁快就被委以重任，升呢成為「吳剛師傅」，喺《歡樂滿東華》負責搏命演出。1990－96年，吳剛師傅喺《東華》年年都有新招，最經典當然係首次登場嘅食燒紅嘅炭，兼且喺油鑊徒手裝滾油入杯，隨即飲埋，睇到全港觀眾嘩嘩聲！不過前TVB高層劉天賜（賜官）就踢爆，嗰一鍋滾油係加咗硼砂，睇落滾熱辣，實際只係得五六十度。
梁朝偉食玻璃
1984年嘅《東華》，有因為《新紮師兄》當時得令嘅梁朝偉做一個好簡單嘅表演︰吞玻璃！表演前梁朝偉先將玻璃敲碎，再揀一小塊出嚟劃穿一張紙以證明係真嘢，食嗰陣仲擺支咪埋咀邊，等觀眾聽清楚冇花假，主持之一嘅嘟姐都叫同事拎定杯水俾偉仔！結果梁朝偉咬碎晒塊玻璃仲吞埋都面不改容，但究竟食嘅係咪糖膠玻璃就無法考究喇。
楊盼盼23層大廈外牆飛奔
武打女星楊盼盼係八十年代《歡樂滿東華》賣命演出嘅主力，退隱多年後佢又喺2000年《東華》獻技，今次做嘅係由樓高23層嘅金鐘聖約翰大廈天台，沿外牆游繩步行飛落地下，即使有晒威也，但都夠觀眾睇到一額汗。賜官回想起八十年代一次楊盼盼嘅《東華》演出，本來講好要吊威也以策安全，點知環節直播出街前，盼盼姐唔裝安全設備，因為對自己有信心喎！犀利～
許秋怡塞入20吋電視 抖唔到氣
細細粒嘅許秋怡自細學習粵劇功架，可能因此身手柔軟，於是1994年《東華》有個環節，係要許秋怡將自己塞入舊式20吋電視機機殼入面！雖然睇落冇咩危險，但係當時為咗證明電視機殼下面唔係有空間偷雞，節目組將成架電視機吊起，司儀之一曾志偉仲遞咪問許秋怡問題，點知秋怡第一句就講「我抖唔到氣呀」，嚇到幕後人員立即放低部電視機，等秋怡極速「獲釋」。
廖啟智著高跟鞋踩鋼線
踩鋼線已經難，仲要著高跟鞋踩？！1990年「智叔」廖啟智喺冇吊威也嘅情況下做呢個表演，只係拎住2把遮做平衡，而條鋼線起碼離地成層樓咁高，安全措施可能只有下面幾張墊褥。成個過程全場屏息靜氣，後來成為「智嫂」嘅陳敏兒喺旁邊睇到好肉緊，好在順利完成。
（部份圖片來源︰Big Big Channel)
