母親節,送她什麼股票最好?
話咁快又到母親節,年年送錢太「老馮」,揀禮物又無頭緒,就不如趁股市調整買股票孝敬阿媽?至於點樣揀,可以從三個方向入手。
師奶炒股往往較後生仔更進取新潮,例如師奶完全唔打機,但都會跟風熱炒騰訊、雷蛇或IGG,但自己炒係一回事,收禮物又係另一回事,皆因係仔女心意都可能想揸耐一些,所以首選都係有息賺又穩陣的股份。
公用股可考慮長年玩十送一紅股入場費又較平的煤氣,至於港銀股,論品牌優勢及派息密度,送一手恆生母親大人應該會收貨。另一穩定之選係收租股,擁有名牌物業組合的太古地產,入場費約六千四有交易 ;至於房託,領展雖然好但係貴,親民之選可揀置富產業信託。唔係話其他細價股無回報,但真係唔好貪平,大前題係股價唔好影響父母心臟健康。
黃金珠寶對母親大人有一定吸引力,唔送珠寶黃金實物,亦可以考慮送相關概念股,考慮到貿易戰衝擊,珠寶零售股盈利有縮水風險,故宜考慮具避險概念的黃金ETF或金礦股,睇股價抗逆力,價值黃金ETF或SPDR金ETF,又或靈實黃金,都算係可以放心送禮之選。
平日母親大人肩負家人起居飲食重任,選股亦不妨考慮與生活有關的股份。例如母親大人經常要幫大家採購或網購零食、汽水,可考慮買優品360或香港電視股票,將來有得賺價就可以幫補這類雜貨開支。
有玩美股的話就更多選擇,例如母親大人仍有童心每年都要去迪迪尼,買兩股迪迪尼當禮物,她就可以過一下做迪迪尼股東癮,同內地親戚講:「你哋去玩呢個樂園我都有份。」
又例如母親大人熱愛淘寶又係馬雲fans兼認同馬生996拚搏精神,幫她買兩股阿里巴巴,她日後北上探親時,見到一班早已炒股多過你食飯的內地親戚,至少都有返份自信。
講到尾,送乜股都好,最緊要有嘢送;母親好多時唔表態,其實盤算緊邊個先係考順仔。
母親節有人陪飲茶之餘,又有禮物收,邊個母親會話唔好?
===================
19網輕鬆爆料熱線,歡迎舉報老細同事19惡行,立即click入去講畀我哋知啦