雅虎香港財經 
港劇大危機：富豪富婆人才荒
近年港劇面對定位尷尬、觀眾流失等結構性危機，想不到步入2021年又多一項危機訊號：富豪富婆演員人才荒。
危機訊號係來自資深藝人李香琴過身，保持貴氣的琴姐晚年間中都會客串演出富婆角色，不過隨著身體狀況欠佳，近年都絕跡幕前演出。除了富婆，適合做有錢佬的演員亦買少見少，近年大台劇集經常係由資深藝人于洋包辦，假如于洋過夠戲癮選擇大幅減產，強如大台都會為搵人做有錢佬而頭赤。
要打破富豪富婆演員人才荒缺口，港劇製作人不妨動用新思維。第一著係力邀內地演員客串演出，飾演講普通話的富豪富婆。過去我哋固有印象係富豪、富婆講廣東話通常帶一點潮州或上海口音，但時移世易，今時今日本地富豪富婆講一口流利普通話，大家都認為合情合理。有此印象打底，港劇出現富豪講普通話、子女講廣東話的場景，觀眾都唔會覺得奇怪，兼且認為港劇終於追得上「時代」。
搵姜濤化老妝頂上
第二著係由年輕演員化老妝頂上，本地電視業難撈，樣樣都要慳住計數。開劇當然越少演員越好，既然係咁，倒不如就由年輕演員化老妝頂上。反正過往港劇都曾出現女藝人要飾演只較她細幾年男演員阿媽安排，由年輕演員做埋富翁富婆角色都係將此安排伸延。為慳到盡，不妨由同一主角兼演自己富豪阿爸或阿媽，反正電腦科技厲害，分兩次拍Key返一幕都好順眼，仲可以炒起話題，激發觀眾好奇心望幾集都有賺。新崛起V台劇種為後生度身訂造，如果日後要廣開戲路，搵姜濤（下圖）做陳錦鴻或張兆輝角色，未必唔可以引起話題。
第三著係用舊片段翻新，涉及富豪富婆劇情離不開爭產、婚外情、商場對決之類，對白亦相當「例牌」。舊劇資源夠豐富，就可以調動創作組狂睇舊劇尋找可用片段，透過剪接及CG剪貼，已仙遊、擅長演富豪富婆演員即可以在新劇與新生代演員同場演出，既有話題又可以慳皮。反正強如迪迪尼近年都用CG將資深演員變回年輕「演出」，這一著都係大同小異不過就土炮啲。
跨界搵外援
最後一著係跨界搵外援，最理想當然係搵到有錢人飾演有錢人，例如搵劉央做女股神、林作扮家道中落太子爺，不過要成功難度極高，退而求其次係找財金KOL做富豪富婆。皆因財金KOL日講夜講金錢話題，久而久之氣質都幾富泰，理想人選包括沈大師同青姐，重演「大時代」，假如成事應該可以吸引唔少以自己唔睇電視為榮的股民，重投追港劇行列吧。
相關文章：
===============
精選資訊網站「中環街市」 臉書粉絲頁
