【理財話題】疫市被迫轉工點賺安慰獎?

·2 分鐘文章

經濟衰退來襲,或者你都忽然要被迫轉工。新工人工、福利可能縮水,想賺回一份安慰獎,最簡單方法係趁勢開個新出糧戶口。

睇餸食飯

大家都怕麻煩,通常出糧戶口就會當作主要來往戶口,銀行瞄準存戶此心態,因此會提供開立出糧戶口迎新優惠吸客。但揀邊間銀行不能單睇迎新優惠有幾大手筆,皆因部分銀行主力吸納高端客,你份糧未達標,份迎新優惠幾吸引都係得個恨字。

所以轉工揀邊間銀行開出糧戶口,你應該回歸現實睇餸食飯。例如花旗的出糧迎新優惠門檻為月薪三萬元。較親民之選有恆生、大新、中銀香港及中信國際,月薪萬零蚊都有迎新獎賞,值得一提係中信國際可選擇以現金回贈方式賺迎新獎賞,算係較實際的開戶甜頭。

早一日定遲一日

中小型銀行為了吸新客,通常會樂意提供較大型銀行更慷慨的出糧戶口優惠。不過企業機構一般會揀大型銀行作為來往銀行,假如你揀中小型銀行就可能要遲一日出糧。亦有唔少在中小企返工的上班族反映,因著公司選用某間中小型銀行,為了準時出糧決定轉會到同一銀行。

考慮到上述兩種情況,你揀邊間銀行開出糧戶口,應該想一想早一日及遲一日出糧對你影響有幾大。如果影響不大固然可以放心選擇優惠吸引的銀行,但必須準時給予家用又或每逢糧尾非常乾塘,你便可能從準時出糧指標選擇銀行了。

優惠是否用得著

精明的消費者選擇自助餐,未必係睇食物款式有幾多,更重要係檢視食物質素及是否啱口味。同樣道理,揀邊間銀行開出糧戶口,其實唔需要數優惠數目,而係睇優惠自己是否用得著。

例如以往很受歡迎的里數,現在全球停擺加上經濟唔太好,即使疫情退潮,你今年都很可能沒有出門打算。即使有計劃在第三季出門,現兜兜買機票可能較用里數換更抵,在此情況下,一千幾百里數優惠吸引力就顯得有限了。

部分銀行會提供自動轉賬授權獎賞,玩法係授權越多越獎得多。銀行諗法係你設定多項自動轉賬,為怕麻煩再轉會到其他銀行機會就較細。所以要賺這類優惠,你就要認真諗一諗份新工打算做幾耐,當年尾市道回暖會否再搵新工,如果係的話,設定自動轉賬授權就可免則免吧。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能