【移民台灣】移居台灣投資創業途徑有乜唔同?

·4 分鐘文章

台灣有同聲同氣優勢,成為唔少港人熱門移居目標。究竟透過投資、創業兩項途徑移居台灣,上車要求有乜唔同。

投資移民要有實體業務

自從2014年台灣取消「存款移民」後,投資移民就成為最熱門的選擇。近年台灣投資移民申請要求不斷提高,最新投資額門檻須達600萬新台幣(約159萬港元),另外對港人最大心理關口係投資不包括置業,而係必須從事實體生意。即使你揀開網店,都要租一個辦公室經營業務,另一較辣條件係要求聘用至少兩名台灣人擔任全職員工,公司須委託合資格會計核數並保留出入數紀錄,公司更至少要營運三年,即係蝕住做都要捱三年。

當然仍有人嘗試開設經營物業買賣或租賃公司在台灣置業以符合申請條件,但這方法能否獲台灣投審會批准是一大問號。所以穩妥方案還是開設實體業務,不過須留意經營業務要在「禁止範圍」以外,如不能涉及化工、傳媒及農業等。既然要搞生意,唔少人會即時諗開餐飲店,不過當局審核申請時會睇你有無相關經驗,所以你有此打算就應該去餐飲店打工累積實際經驗。開餐飲店另一隱憂係輸錢風險大,不斷蝕錢又要做夠三年,你投入資金很可能超過600萬新台幣。

唔想極速清袋,有意見指公司註冊資本為600萬新台幣,但由於未有要求營業額須達標,申請人其實可以選擇先投入小本經營,講得白啲就係「hea」做生意。例如以符合最低工資六千多元請兩名台灣員工,並在三、四線工貿區租個蚊型辦公室,三年輸盡都係五、六十萬港元,相對開餐飲店失敗風險度較低。當然這只係最壞情況,如果你有生意頭腦又用心投入,以小本起步亦有機會在台灣生意越做越大成為自己落腳當地的事業。

由於投資移民須要開公司、撰寫經驗計劃書、匯款、開公司戶口(流程參考),亦涉及唔少會計法律工作,未開過公司的人難免感到無從入手,另一難關係要找一名台灣人任保證人,故不妨花多數萬元找中介公司幫手克服各個難關。

創業計劃要捱夠五年

手頭資金有限,本身從事創科、文創領域的年輕人,則可以嘗試透過創業家簽證到台灣創業。創業家簽證吸引之處係基本上不設投資額要求,只係較多人符合的申請條件係獲創投投資或獲認可海外集資平台集資達200萬新台幣(約53萬港元)用作創業。但如果你係創科、設計專才,只要取得海外專利權,又或成功進駐當局指定創新園區、在指定海外創業競賽如Web Summit、Red Dot Design Award得獎。又或你是電影創作人,作品曾入圍當局指定國際比賽及影展,都符合資格申請創業家簽證。

創業家簽證吸引之處係門檻具彈性,但最大挑戰係創業後要按投資要求捱五年。計劃要求初創企業每年經營收入達300萬新台幣或支出達100萬新台幣,意味你蝕住做都要預約燒錢53萬港元。另外每年最少要聘請三名台灣人任全職員工。每年經營達標才可以續簽居留證,住滿五年(每年最少居住183日)才可以申請入籍。所以考慮透過此途徑移居台灣,不宜低估捱五年的真正成本,亦要好好評估自己創業項目的盈利能力。對創科人才而言,假如手握曾獲國際獎項目或具潛力的海外專利,要移居海外亦不乏選擇,台灣都未必係優先考慮進駐地區了。

申請居留官方指引

伸延閱讀:

6大熱門移民地條件門檻方法比較

【移民攻略】移民定移居?應該點樣揀?

【低成本移民】投資36萬/買樓移民 精選6大低門檻國家

【移民英國】揸BNO移居英國仲要諗私立學校?

【投資移民】愛爾蘭投資移民計劃投資捐款創業任揀