【投資移民】愛爾蘭投資移民計劃投資捐款創業任揀

·5 分鐘文章

上一篇介紹透過打工移民愛爾蘭途徑,有相當資產又唔想打工的人士,亦可以透過投資移民方案登陸愛爾蘭,仲可以選擇投資、捐款或創業。

先申請後投資

愛爾蘭投資移民計劃(Immigrant Investor Programme, IIP)一如其他國家的黃金簽證計劃,對申請人的要求及居留條件都較具彈性,大前提係申請人要有足夠的財力。IIP的資產門檻係擁有200萬歐元資產(約1832萬港元),並要提交收入、資產、借貸證明顯示個人財務狀況及資金並非來自借貸。IIP另一吸引之處係採取先申請、後投資方式,申請人提交申請獲接納後才投資指定的項目,避免錢使了但申請不獲批的風險。

IIP每年都會分階段接受申請,今年尚有8月31日至9月4日及10月26日至30日兩個階段接受電郵或郵寄提交申請,評估委員會已公布疫情期間仍會繼續開會審批申請。當申請人收到初步獲批通知信後,就要在四個選項中揀一個作出投資。

首個選項係以個人身份投資100萬歐元在一個或多個愛爾蘭已註冊的企業上,投資期為三年。當地有發展商瞄準此商機推出回報達4%護士宿舍項目,但投資期就長達五年。第二個選項係投資100萬歐元於獲愛爾蘭中央銀行監管及IIP計劃認可的基金,基金主力投資愛爾蘭企業,投資首要大原則係協助企業創造更多職位,投資期為三年。申請人可致函愛爾蘭移民局 (INIS) 索取認可基金名單。

第三個選項係投資在愛爾蘭交易所上市的REIT,投資額為200萬歐元,投資期為三年。三年投資期完成後可減持最多50%,到第五年減持就不受限制。最後一個選項係捐款,申請人可向愛爾蘭藝術、體育、健康、文化等對國民有益的項目作50萬歐元捐款,如改以五人或以上團捐方式,捐款額就調低至40萬歐元。

四個項目中,較穩陣應該係REIT。愛爾蘭龍頭REIT在資產增值及盈利能力均唔錯,擁有優質商用物業的Green REIT去年就被Henderson Park Capital斥資13.4億歐元收購,出價較Green REIT股價高25%。另一間專注做住宅物業租賃業務的 Irish Residential Properties REIT,八月頭公布上半年收金收入上升30%。

不過押注REIT心理關口係投資額大及投資期長,所以較受香港申請人歡迎的選項反而係捐款。捐款無回報似乎係「射落海」,但透過移民顧問可以搵齊五個人團捐,捐款額40萬歐元相當於約366萬港元,對身家逾千八萬人士來講,只係拎相當於一個納米盤資本出來就直接達標。

IIP另一賣點係毋須坐移民監,申請獲批後,申請人及其家屬會先獲批兩年Stamp 4 居留簽證,之後再續期三年,這五年每年只要在愛爾蘭追逗留一次便符合要求。對暫時仍想留港工作或做生意的朋友來講,居留彈性就有一定吸引力。

用創意闖關

無逾千八萬身家,但手握具潛力的生意點子及集資本事,亦可以嘗試透過初創企業家計劃(Start-up Entrepreneur Programme, STEP)換取登陸愛爾蘭入場券。

STEP關鍵要求係申請人的商業點子富創意及具潛力,並有力開托國際市場,另外申請人須擁有50萬歐元營運業務資本。申請人須提交其初創業務的計劃書,介紹其產品及業務的創意及潛力。如業務已投入經營,申請人亦要提交企業的審計紀錄。按計劃的介紹,初創業務如在三至四年間營業額達1百萬歐元及有力開創十個職位就被視為高潛力初創業務,將更容易過關。申請人亦要提交50萬歐元資本的證明,包括個人資本、商業貸款及前期投資者的注資證明。

申請人通過STEP審批後,就要在愛爾蘭成立初創企業並以全職身份投入經營業務。與IIP一樣申請人先獲批兩年Stamp 4 居留簽證,之後通過審核業務狀況達標可續簽三年,之後再獲批五年居留簽證。

但留意要申請入籍,申請人及其家屬仍要滿足愛爾蘭居住條件,包括九年內住滿五年,申請入籍前一年連續居住於愛爾蘭,居留期間無犯罪紀錄及自食其力未對愛爾蘭當局帶來財政負擔。取得愛爾蘭護照後,可選擇到英國或歐盟成員國學習及定居,大大擴闊居住及工作版圖。

伸延閱讀:

【打工移民】愛爾蘭工作簽證上車要靠「關鍵技術」

【移民澳洲】留澳工作簽證延五年部署策略

【投資移民】馬爾他投資移民物業可租可買

【投資移民】葡萄牙黃金簽證要留心三大風險

【投資移民】移民塞浦路斯應揀永居定入籍?