笑到最後|新騰訊:Sea Limited(高明)

·3 分鐘文章
新騰訊:Sea Limited
曾經少數令香港股民自豪嘅騰訊,以為有望接滙控班,成為新一代股王,股價表現竟然同三線股分別不大。

中國反壟斷主管機關周六勒令騰訊(700)30天內放棄音樂串流獨家版權,同期相關機構規定學科類培訓機構不得上市融資,且須統一登記為非營利機構。 消息傳出後,美港中概股先後大插水,繼而騰訊為首的中資科技股立即下跌,曾經少數令香港股民自豪嘅騰訊,以為有望接滙控(005)班,成為新一代股王,股價表現竟然同三線股分別不大,再次印證港股市場,投資者付出藍籌的價錢,買來高增長股的跌幅。

下載Yahoo財經APP

美股、外匯、加密貨幣免費即時報價,自選投資組合獲取相關新聞提示。

香港藍籌股對比美國藍籌股,同樣係軟件、社交為主嘅Google(GOOG)及facebook(FB)已經破頂再破頂。若果再論細節,2月科技股股災後,騰訊竟然彈都未彈過。

周星馳喺食神有幾句對白:香港係一個奇蹟嘅地方……我冇咗嘅嘢我可以攞得返。翻睇上一代股王滙控,返家鄉遙遙無期,同板塊嘅美股金融股已經破頂;騰訊亦有同一命運,就係美股同業接連破頂,騰訊遠遠不及。淨係拎呢兩隻股來講,港股市場仲係咪咁神奇,真係好難講,反而美股每隔三個月暴跌後再破頂,邊個係神奇隊長謝拉特,「好似一個魔術師表演到最後除晒衫仲可以喺條褲變隻雀仔出嚟」,似乎美股神奇指數高啲。

今年升近五成 騰訊同期跌20%

大家可能會話:騰訊嘅業務模式非常獨特,再加上佢背後嘅強大國家支持,反觀美股科技股之間嘅競爭強大,經常互相入侵對方領域,相對中概股就有尋租利潤,並非等閒美股可以比較。組合入邊有騰訊,始終都係在所難免。

曾經風光嘅滙控,由股王落入凡間。好彩嘅係,香港精仔係一個概念,唔係一個地區,邊度搵到錢,就去邊度。再加上過去幾年科技同市場開放嘅程度突然加速,一個好普通嘅散戶,已經好容易接觸到香港以外嘅股票市場。

騰訊嘅概念同背景雖然獨特,但只要肯舉目四顧,其實近似嘅股都唔係冇。喺美國上市嘅Sea Limited(SE),今年股價升45.69%,相對騰訊今年累跌兩成,股價已經出現差距。

Sea Limited就係新加坡騰訊,集網上遊戲、網購以及網上金融於一身,比起騰訊更好嘅係,呢隻更加新,股價由2017年上市大約16美元至今升18倍,相對騰訊上市至今升662倍,股價上升空間仍然充足。

新加坡同香港係同類型嘅城市,沙盤推演,兩者企業晉身霸權之後,好容易取得尋租地位,情況等同騰訊,亦都係一般美股提供唔到嘅尋租概念。Sea Limited市場係東南亞市場,包括印尼、越南、泰國、菲律賓、馬來西亞、新加坡及台灣。部份國家仍然未脫貧,所以潛力肯定更高。現時嘅Sea Limited為290美元,大概係騰訊拆股前290港元咁上下水平。

更重要係,新加坡政局穩定,喺美國上市遇到政策風險機會低,尋租得嚟又安全。

騰訊表現叫人垂淚,但世界勝在有新騰訊,香港人亦都唔會忘記騰訊,更加會搵下一隻騰訊。10年過後,Sea Limited股價肯定跑贏騰訊,立此存照。

高明

facebook:https://www.facebook.com/bigricetea

IG:https://www.instagram.com/koming.usstocks/

作者簡介︰賺錢係目標,炒股係手段,專欄記載由手段到目標嘅過程。

本欄逢周三刊出

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能