笑到最後｜ChatGPT與菲傭（高明）

對住ChatGPT，就好似對住Intern咁。 (WANAN YOSSINGKUM via Getty Images)

根據一個非正式嘅統計（即係高明聽返嚟），十個有九個香港女性/師奶，對屋企個菲傭極之不滿，有剩嗰一個就嬲到炒咗個菲傭自己做。

下載Yahoo財經APP

美股外幣即時報價 多國新聞任睇

無可置疑菲傭就係一面鏡，反映主人落嘅命令，有啲似2019年迪士尼（DIS）出嘅電影阿拉丁嗰盞神燈，你許嘅願太空泛，神燈就會用自己嘅方式演繹嗰個指令，所以許願一係要簽約咁狂寫細節，一係將命運交托畀燈神。

同樣道理，菲傭嚟到知道自己月薪五千蚊（疫情炒價試過過萬），喺社會嘅地位，佢哋都略知一二，要為份糧出幾分力大概有個譜，空泛一句「cook rice」，夜晚出到嚟嘅結果可能只係煮熟啲白飯，飯本身可能已有太淋太硬嘅風險，而且嗰餐唔會有餸。

所以真係要有周詳嘅計劃，最重要係慣性，等菲傭知道每晚三餸一湯連白飯係基本嘅嘅要求，冇錢、冇餸要提早出聲，唔好等夜晚得嚿飯。

OpenAI旗下嘅ChatGPT高明都玩咗一排，比較簡單嘅評論，就係個AI會好認真咁講一啲唔一定係事實嘅嘢。以寫文章為例，例如寫一段文字介紹一件產品，點都要有證據支持講法，例如嗰嚿膠特別硬、好㩒用，暫時AI都解決唔到，畀唔到落命令嘅人好大信心。

落命令要落得準

更重要係，同請菲傭一樣，落命令要落得好準。大家可能都有喺公司同唔同資歷嘅人合作過，對住ChatGPT，就好似對住Intern咁，覆返啲嘢比你，都叫似層層，但硬係冇信心可以即刻用，兼且有時冇頭冇尾冇來源，結果自己寫仲好。

機械學習嘅好處，就係好多人不斷同佢訓練，好處就係好快學識，可能半個月後，AI嘅能力已經推翻高明上述嘅講法。壞處就係係人都可以同佢Train，變相冇得同用戶建立默契，當然，呢啲唔係好難嘅設定，佢肯就可以專門單一用家培訓，知道個別用家想點。

至於依家講AI結果取代Google，都係言之尚早，或者兩樣嘢唔同，有咗ChatGPT，反而更加需要Google搵來源核實，ChatGPT稱唔係用網上資料同只可追溯2021年前，但遲早都代大家搜尋埋，其實兩樣嘢嚟，等於你請咗菲傭，佢有份煮飯，但你都會出街食一樣，有替代，但未致於被取代。

對於個人，AI就係一個菲傭，等於Grammarly，發明Grammarly後，係咪唔使再學英文文法？其實都只係輔助工具，關鍵反而係用家落指令要清晰啲，一句「cook rice」諗住人哋幫你搞掂埋，一係好貴請個好醒嘅管家，一係預助夜晚餐餐齋食白飯。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出