【細So偷食】「商台韋小寶」前商台DJ細So 感情網絡好複雜 秘戀葉佩雯 先後娶「阿Wing」
前商台DJ細So(蘇耀宗)被爆偷食KOL 阿B,好老公好爸爸形象一朝盡毀!不過喺呢幾年「定性」之前,識彈結他嘅細So感情生活絕不平淡,甚至連節目拍檔森美都開咪稱細So做「商台韋小寶」!
葉佩雯
本來冇咩人知,但係Eric Kwok(郭偉亮)喺Yahoo TV節目《Mean 傾》自爆老婆葉佩雯(Grace)曾經同細So拍過拖,Eric仲話由Grace口中得知,原來喺佢憑作品《幸福摩天輪》彈起之後,商台一班DJ之間流傳過Eric家境富貴嘅講法,甚至話Eric係地產家族郭氏後人!
張詠妍(前妻Wing)
細So 2006年同商台同事張詠妍(阿Wing)低調結婚,睇落係辦公室戀愛修成正果,但實情係阿Wing入電台前已經同細So拍拖,女方想入行於是瞞住男友參加DJ比賽,最終成功加入商台。不過細So同阿Wing嘅婚姻維持到3年左右,2009年二人分開。阿Wing回復單身無耐就同商台高層Riley(即填詞人林若寧)拍拖,翌年閃婚。細So於商台的工作上不時要同Riley合作,兩個男人甚至合寫過陳奕迅《月球上的人》!
陳穎楠(老婆Wing)
同舊愛Wing分開一排,細So 好快就搵到另一個阿Wing(陳穎楠)。陳穎楠做過model,亦係旅遊記者,採訪期間認識蔡瀾而結為師徒。舊愛Wing閃婚,細So亦都喺2011年同陳穎楠結婚,婚後2年現任Wing誕下大仔Jack,而細仔Max就喺2016年出世,一家4口住喺大嶼山村屋,經常去海灘玩。
而陳穎楠一度被捲入黃浩與徐濠縈多年前嘅食肆風波,有報導話陳穎楠兩姊妹分別同黃浩拍過拖,後來細So代為否認。