郭晉安有份創立 草姬申請上市揭去年賺4千萬 與歐倩怡分開前後轉讓股份俾家姐

早前宣布同歐倩怡離婚嘅郭晉安，尋日又成為新聞人物，不過今次係登上財經版。

郭晉安有份創立嘅保健品公司申請上市

保健品公司草姬集團申請上市，由披露文件得知，為該品牌出任代言人嘅郭晉安，原來同佢家姐郭致因喺2000年創立草姬，並於2002年為公司產品代言，而費用只係一年64萬元。上市文件所見，郭晉安出任草姬非執行董事，主要負責為集團的市場營銷提供整體戰略建議。而根據財務報表，草姬上個財政年度收入2億5千萬元，錄得盈利近4000萬元。

郭晉安同家姐郭致因（右）一同創立草姬，並為品牌擔任代言人多年

而根據上市文件提及草姬嘅歷年股權變化，郭晉安喺2022年3月23日以代價30萬元，轉讓草姬國際相當於已發行股份3成嘅普通股予郭致因，同一日郭晉安以代價15萬元，轉讓草姬另一附屬公司ZINO International 15萬股普通股予郭致因，同樣相當於已發行股本3成。兩次交易後，郭晉安家姐及姐夫分別擁有呢2間公司90％及10％股份。

財經KOL馬索諾發文指出，公司要上市而需要重組喺好平常嘅事，但郭晉安轉讓股份俾家姐嘅時間點頗微妙，認為「同歐倩怡開始分開生活嘅時間相若」，未知一股不留係咪同財產安排有關係。而根據早前郭晉安同歐倩怡月初宣布離婚嘅發文，二人都表示「兩年前起我們已經分開生活」，同安仔轉讓股權嘅時間點相若。

歐倩怡

喺離婚消息傳出後，有傳媒幫郭晉安計數，估計安仔名下多間住宅及工商鋪物業總值近1億元，但歐倩怡以及二人一對仔女全部冇份持有。有指郭晉安認為離世前應將財產捐出回贈社會，歐倩怡認同呢個講法，而且歐唔想處理文件，買樓文件都係安仔自己上律師樓處理，於是全部物業都係郭晉安持有。

歐倩怡

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！