雅虎香港財經 金融花生│食肆執笠？做好質素同服務先啦！（言平）
話說，近日有個新開嘅FB群組，短短數月內已經吸引到超過30萬人關注，個名叫「全港店舖執笠結業消息關注組」。咁多人關注，其中正正反映香港人對食店一肚氣。相信好多人都受過食店服務員嘅氣，態度極差，毫無禮貌可言，食飯時間又限住一個鐘內要交枱，而家最新「進化」到40分鐘要還枱。其實有數得計，點餐要用大約5分鐘，等餐又要5至10分鐘，食完飯飲杯嘢都要5分鐘，剩返幾多時間食飯？打工仔返工已經好辛苦，趕頭趕命，而家連食餐飯都要迫住快食，仲要受埋啲服務員氣，難怪咁多人想啲食店執笠。
美股外幣即時報價 多國新聞任睇
北上消費影響 非特別嚴重
無可否認，而家香港要經營一門生意的確係唔容易，但實際情況又係咪真係差得好似死城一樣咁誇張？望望實際數據，根據食物環境衞生署統計數字，2019年（即係疫症封關前）正式牌照數目共有28,212間，當中普通食肆有11,448間、小食食肆有3,927間、食物製造廠有8,275間等。到2023年，正式牌照數目共有33,536間，竟然比2019年仲要多出5,324間（或者18.87%），當中普通食肆有12,830間；小食食肆有4,350間；食物製造廠有11,084間等。各項數字都出現上升，從上述可見，實際上情況與大眾觀感出現明顯矛盾同唔一致。
再望望啱啱過去嘅復活節，人人都話北上消費，根據入境處資料顯示，復活節假期前夕及4日假期共5日，香港居民離境人次有228萬，當中大部分是上大陸。港人從羅湖、落馬洲支線、西九、深圳灣、香園圍同落馬洲等6個主要陸路出境口岸離境人次有166.9萬。如果同5年前2019年復活節假期比較，其實只係增加咗10%，絶對唔算得上大幅上升。即係點？即係雖然香港市道唔係太好，多咗人北上亦係事實，但實際情況並非坊間輿論講到咁誇張。
所謂一雞死一雞鳴，有人執笠唔做，但亦有人敢於創業。客觀而論，而家鋪租平咗，成本低咗，本土競爭少咗，對打算創業嘅人士嚟講都可能係好事，最起碼就算輸，都無輸得咁甘。而且，坊間重有好多食店大排長龍，有啲仲加價。無他，只要保持店鋪高水準、好品質、有服務，自然就會客似雲來。
言平
本欄隔周四刊出
