雅虎香港財經 【電影LOL】失聰學校集體性侵事件 台片《無聲》睇到超窒息
台灣金馬獎頒獎典禮星期六舉行，今屆獲得8項提名嘅台灣電影《無聲》今個星期四將會喺香港上映。《無聲》改編自轟動一時嘅國立臺南大學附屬啟聰學校集體性侵案，被稱為題材相若韓片《無聲吶喊》嘅台灣版，戲內氣氛充滿壓抑與無力感，睇得人好沉重！
2011年，失聰學生就讀嘅啟聰學校被揭發駭人聽聞嘅性侵事件，有家長發現就讀該校嘅女兒神情有異，細問之下得知驚人真相，向學校反映但係校方以息事寧人態度處理，家長決定追究到底，發現學校官官相衛、老師視而不見、學生由受害者變成加害者等等令人扼腕嘅現象。
呢件事當年喺台灣相當轟動，尤其校方處理手法只求卸責逃避，時任校長喺事件被一間教育基金會揭發之後，同外界講基金會所指嘅性侵案件宗數有誤「不是128件，只有71件！」，喂！一宗都嫌多啦吓話？另外，前校長認為家長都要負責任，因為佢地冇準備自衛用品！仲有仲有，有家長喺學校見到學生性侵女學生，向老師通報，對方話「有女生入讀之前，家長就安排個女做手術，切定個子宮」……你明白點解咁哄動啦？！
令人火滾嘅內情太多，但係《無聲》導演柯貞年以冷靜方法，透過失聰學童以手語溝通嘅特性，安排多場戲份一如戲名一樣「無聲」進行，營造出難以宣之於口嘅壓抑感，觀眾更能代入各個角色嘅內心衝突。
有呢個話題做背景，《無聲》喺台北電影節率先登場嘅戲飛10分鐘就賣晒，而正式上映後票房亦相當不俗，至今已經突破4千萬台幣，並且有多位官員同政界人物包場觀賞，希望更多人正視問題。
卡士方面，有憑《叔．叔》奪得香港金像獎影帝嘅太保，以及台灣金鐘視后暨金馬影后楊貴媚2位實力派之外，飾演學生嘅都係新晉演員。來自韓國嘅金玄彬飾演學長小光，狂妄性格背後原來別有內情，獲提名金馬獎男配角，得獎呼聲甚高！而飾演被性侵女生貝貝嘅陳妍霏獲提名最佳新演員，拍片時年僅18歲，第一次參演就做女主角，陳妍霏同其他演員一樣要用3個月學手語，更加向大學申請休學配合拍攝。
更多電影文章
【電影LOL】今個星期睇咩戲 《鬼滅之刃劇場版》《屠．姐上錯身》《親愛的房客》《靚太軍樂團》
【電影LOL】荷里活最環保嘅迪士尼又一翻拍之作 今次輪到史迪仔套《扮嘢小魔星》
【電影LOL】梅麗史翠普12月又有新戲 Let Them All Talk冇劇本盡見演員功力
【電影LOL】《鬼滅之刃劇場版》香港開畫收過300萬 鍊贏大片《天能》做年度開畫冠軍
