雅虎香港財經 
香港將首現「死人」概念Reits？
特首出招支持受疫情重擊嘅本地工商物業市場，既為非住宅物業撤辣，亦銳意推動香港成亞洲重點Reits市場，並研究放寬Reits投資限制。在政府支持下，香港會否出現首隻死人概念Reits？
催谷香港Reits市場再加工商物業買賣撤辣，正路睇應該對商廈物業最有利。可惜疫情令工作模式大變，唔少國際巨企都講明往後三、四成工時將安排員工在家完成，況且企業積極縮皮裁員，兩大趨勢夾埋令商廈需求有減無加。連測量大行早輪都提倡商廈大業主改行「會員制」，企業租戶由交租改為交會費，並可以隨時按員工數目縮減租賃商廈面積。測量大行拋出「會員制」建議，明顯睇淡中、長期辦公室需求，而且一旦「會員制」成為主流，商廈物業租金收入就無以前咁穩定，將這類物業打包成Reits上市，要維持長年派高息亦有一定難度。
工廈重建骨灰龕場
商廈難做，要打響本地Reits市場可能要靠死人概念。所謂死人概念即係殯儀館、骨灰龕場等主打人生最後一程服務物業。經濟順境逆境，人生最後一程服務都有需求，相對商廈提供租賃收入就更穩定。骨灰龕雖然好賺，然而以往籌建工廈式骨灰龕場都會遇上阻力爛尾收場，但早前就有財團突破缺口，成功補15億地價將葵涌工廈重建為12層高骨灰龕場，可見只要揀中遠離民居的工業區，興建工廈式骨灰龕場仍有得諗，假如興建兩、三棟骨灰龕場工廈，再加一間殯儀館，計到數預計每年有5厘息，相信香港市道點樣大吉利是都吸引到散戶捧場，而且此概念可謂開創世界先河，外媒至少當趣聞報道，對提升香港Reits市場人氣度應該幫唔到少吧。
===============
精選資訊網站「中環街市」 臉書粉絲頁
