點解黃Viu多嘢睇過Viu台?

·2 分鐘文章
.
.

黃Viu晒冷式播木村舊劇掀起煲劇潮,大家用黃Viu煲劇之餘亦不禁衍生一大疑問,點解黃Viu會較花重金營運的Viu台更多嘢睇?

打開黃Viu,宇宙級日劇《悠長假期》(下圖)、舊版《東京愛的故事》固然搶眼,你亦會發現連石原里美做藥劑師新劇亦已上架,動畫部分亦陣容強勁,既有日本爆紅《鬼滅之刃》、《食戟之靈》,亦有經典作《SlamDunk》,人氣韓劇《夫妻的世界》、《出師表》同樣見上架。單計劇集及動畫,就已經較Viu台更吸引。

.
.

串流媒體黃Viu戲碼較Viu台強,最基本原因係規範問題,Viu台屬於持牌廣播頻道,廣管局對節目內容限制不斷與時並進,即係只會嚴不會鬆,加上香港存在唔少「投訴師」,一見到內容踩界就會出手投訴。所以2020年的電視台不能像八、九十年代亞視般,以低收視為本錢進取地採購踩界紀錄片或動畫。相反黃Viu屬於串流平台,採購節目彈性大得多,頂多係將太離譜內容過濾一下就可以,自然更有空間建構強勁的內容組合。

.
.

另一關鍵原因係「Netflix夢」,Netflix崛起成媒體霸主,令串流平台成為環球媒體巨頭積極押重注的戰線。貴為本地電訊媒體巨頭的電盈又豈能執輸,除了大撒幣強化內容組合,早輪電盈公布業務重組,把NOW TV收費電視業務售予旗下香港電訊,但同時透露會檢討黃Viu串流媒體業務,包括引入策略投資者或分拆上市。可見在「Netflix夢」之下,黃Viu只要加速谷大串用量(現時是東南亞第二),身價就可以水漲船高,即使唔分拆上市,都有力吸引騰訊、軟銀、阿里等大買家作策略投資,估值又可以倍升。

至於Viu台免費電視相對黃Viu,是否變得更雞肋?論概念,傳統電視當然及不上串流媒體,而且網上平台持續吸走電視台廣告客,即使Viu台收視再三逼近TVB,客戶都可能寧願在黃Viu落廣告。但Viu台仍有一個不能撼動的價值就係新聞,據悉今次電盈出售NOW TV業務仍決定保留NOW新聞部,就知道新聞部的獨特價值。單係新聞部加大氣電波,就足以增加企業的份量,所以只要唔使蝕到喊,Viu台都係值得做的業務吧。

===============

精選資訊網站「中環街市」 臉書粉絲頁

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能