香港股市 將在 3 小時 14 分鐘 開市

【Hea富Startup】別跟生意談戀愛(郭釗)

大部份人做生意前,都夢想做大老闆,旗下伙記一百幾十,好不威風。好似李超人咁,生意遍布全球,幾十萬人為其打工,正所謂無人之下萬人之上,做皇帝一樣。雖然知道遙不可及,發吓夢都冇壞。但原來發夢都會發壞人,許多人做生意就是本著貪大求全的心理,生意額越大越好,伙計越多越好,在市道逆轉時,壓力爆煲,生意、積蓄、健康、家庭,一次過清袋。

淡市個個月齋輸

有次跟做飲食的朋友吹水,就以飲食業為例,裝修人工食材舖租再加燈油火蠟,一個月上百萬開銷,生意好時二三十巴仙毛利,遇著市道不景,個個月齋輸,兩個月就冇咗一年利潤,第三個月已經蝕入肉,但呢個moment,好多人會選擇「守」,因所有裝修硬件伙記都喺晒度,請到熟手伙記亦不容易。希望在明天,希望捱過這段日子,將來生意好轉就追得番,但不少失敗的例子,正正因為這份樂觀,將艱苦經營一生心血輸盡,還要欠落一屁股債。

近年你可能覺得類似例子較少,原因有二。一,自05年後經濟向好,自由行帶動各行各業,就算賺不到大錢,也可維持。二,創業的人越來越少,教育制度不鼓勵創意,只著重準確答案,制度下的贏家只能是專才,成就不到創業人才。香港的情況跟外地相反,往往是制度下的失敗者、或者草草完成學習的,成為老闆的機率較高。

近月各行各業生意淡薄,有公司出現減薪、凍薪情況,亦有銷售行業大大力捽數。

所謂創業難,守業更難,要維持賺錢,需不斷求變,走過經濟低谷,等待行業爆發期出現,才能一飛沖天。

結合以上種種,本欄認為選擇比堅持更重要。你選擇一個難以成功的方法,例如你今時今日打算加入娛樂圈,目標成為天皇巨星,就算身材樣貌聲色藝俱全,成功機會也比30、40年前難上百倍。很多在大台苦行十幾年寂寂無名的藝人,轉行後即時海闊天空,可苦迫自己行一條荊棘滿途的路呢?

本欄從來不鼓勵人做我做,最反對經營資金人力成本高的行業,這類行業賺錢時不敢攞錢使,蝕本時又不敢或不可縮,唯一套現可能性是被人收購或上市。以現時的上市條件及殼價,難度高之餘也沒甚價值,長遠來說,輸面比贏面大得多。安安穩穩打份工無咁嬲。

做事要認清楚初心,做生意的目的是賺取打一世工也賺不到的錢及生活方式,「選擇」一個賺錢時可套出來再轉換成資產,在不景氣時負擔不重的生意模式,比坊間所謂名師推銷的「堅持」更重要。Work Smart always stronger than Work Hard,搵到適合自己的光明路,那怕是小路,才值得去堅持。

《HEA富學》作者,Finsight ED founder
https://www.facebook.com/heaology.edu