雅虎香港財經 193郭嘉駿IG追蹤人數突回升 疑似有「老婆」買Followers造假
ERROR成員193郭嘉駿開設自家服裝品牌《LILABOC》IG網店，早前被網民追討收錢半年未發貨嘅交易款項，不過193就喺IG公開佢哋嘅對話截圖，內容極度串嘴，又同其他網民表示：「唔鍾意咪唔好關注我」，結果令追蹤人數由41萬大跌至39.5萬，流失近2萬粉絲；不過，呢兩日193 IG追蹤人數又再忽然回升至40.8萬，網民就發現入面好多都係一啲無頭像嘅數字假帳號，仲有唔少嚟自中東、阿富汗嘅帳號，疑似有買Followers之嫌。
對於193 IG追蹤人數急升，網民就喺討論區熱烈討論，直斥193或一班粉絲買Followers：「買Followers都買得醒少少，而家真係知你咩料，知你垃圾」、「班3嫂好嬲好嬲，用哂成副身家買followers，按左層樓未」、「啲新follower係咪佢燒個啲紙紥公仔嚟」等等。不過好快就有網民分享咗一張193粉絲group對話截圖，指一名粉絲自爆：「幫33係淘寶買咗1000 followers，好似比人發現左」另一名193「老婆」就回應：「那位寫幫買1000 followers的人，絕不是193 fans，亦已被踢出群組。」
193未有回應其IG追蹤人數一事，不過噚晚就喺網店IG出post指中秋限定月餅已售罄，同時就早前網店風波向大家致歉：「喺度同大家講聲唔好意思」，不過就講到明唔係向該位事主道歉：「並唔係因為無禮地回覆首先出言不遜侮辱粉絲嘅「客人」，而係因為事件為社會及各方朋友帶來不便，實屬抱歉。」193仲提到網店嘅官方網站同收費以後會有專人處理，自己則會繼續努力工作及持續進步。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
