雅虎香港財經 CFO財報解密│小米成功進軍電動車市場是禍還是福？（Benny）
小米（1810.HK）歷史性發佈第一款電動車SU7，訂單喺短時間內突破萬架甚至5萬架以上。網上資料顯示訂購量已超出今年產能，即係有部份客戶好可能要等到下年先可以揸到小米SU7。汽車銷售氣氛感覺熾熱加上大行唱好，小米股價假期後第一日一度升超過15%。雷軍成功將小米由手機生產商轉型並擁抱電動車市場嘅同時，亦坦白承認初始賣嘅電動車必定虧本，但可能佢只係講咗小米汽車所將會面對挑戰嘅一小部份。
美股外幣即時報價 多國新聞任睇
內地電動車銷售弱
根據中國乘聯會最新電動車銷售數據，2024年2月銷售量係38.8萬架，同比下跌12%、環比下跌42%，說明呢刻市場整體需求疲弱。你可能會覺得今年2月係中國農曆假期，有季節性因素影響。
但望埋電動車龍頭比亞迪（1211.HK），2024年第一季度銷售數據（成季數據睇撇除咗季節性因素），同比只係上升14%，有增長但就遠低於一年前，即係2023年第一季嘅90%升幅；環比2023年第4季都下跌34%。
你又可能會諗小米嘅規模，邊度食得晒成個中國市場，亦都唔能夠同比亞迪嘅龐大銷售基數相比，要比嘅應該同相對規模細好多嘅電動車三傻比。根據三傻上市後公開披露數據，由2018至2023年，除咗理想（2015）2023年歷史性錄得經營利潤外，其他任何一年無論係小鵬（9868）、蔚來（9866）定理想都係虧損，而且虧損金額最低消費係以10億計，亦都試過有百億虧損。
燒錢難免不利業績
蔚來同小鵬係2014年成立，而理想就係2015年成立。即係話由成立到而家9年時間嘅蔚來同小鵬依然未能盈利，年年數十億計嘅持續虧損、燒錢。而理想嘅增程電動車策略可能相對獨特啲，都要喺成立8年後先歷史性做到首次盈利。可想而知做電動車唔係一時三刻就可以貢獻小米盈利，反而大機會係一個令佢投入更多資本、費用，持續產生虧損嘅業務。
再參考埋都係手機生產商嘅蘋果，都放棄研究咗10年嘅造車計劃。你可以話佢冇小米咁叻連一部電動車都做唔到，你亦可以話佢呢刻根本唔睇好呢個市場嘅前景。
行業整體增長動能走弱（包括Tesla、比亞迪），細規模嘅車企長期虧損、科技巨頭蘋果忍痛放棄做車，種種跡象都說明小米呢一刻擁抱電動車呢個競爭激烈嘅市場，需要面對嘅挑戰會好巨大，亦都唔好預佢好快有盈利。反而大機率嘅係而家啱啱喺盈利方面有改善嘅手機本業，可能要較長時間幫補電動車嘅虧損缺口。
Benny Yam
執業會計師
本欄隔周三刊出
