雅虎香港財經 CFO財報解密│比禁用iPhone對蘋果有更大影響嘅事情
雖然iPhone15已經推出市場，但蘋果（AAPL）最近股價依然疲弱。年初至今雖然升咗37%，但近一個月原來跌咗成5%。
美股外幣即時報價 多國新聞任睇
歐盟數字市場法案平台清單
好多人第一時間會諗到係同近期有傳中國政府部門、國企禁用蘋果手機有關（雖然中國外交部已經否認有關消息），但其實喺歐洲嗰邊發生嘅事情，唔係有太多人講，但對蘋果業務嘅影響將會更深遠。
講緊嘅係2023年9月5日，歐盟執行季員會就早前生效嘅歐盟數字市場法案（DMA），列出咗一個Gatekeepers平台清單，當中包括蘋果AppStore在內嘅多個大型科技公司數碼平台。而呢個Gatekeepers清單內嘅平台，被要求要喺6個月內喺歐盟區全面遵守呢個法案，否則相關公司會面對巨額罰款。
蘋果目前業務結構
蘋果本身業務主要係來自iPhone硬件銷售，2023年嘅第2季硬件銷售606億美元，佔比74%，而服務收入只有212億，佔比26%。但當睇埋毛利潤：硬件毛利214億，佔比59%，服務毛利150億，佔比已經去到41%，顯示服務業務差唔多可以支撑蘋果一半嘅利潤貢獻。
硬件業務同服務業務嘅收入佔比同毛利佔比差異咁大，係因為兩個業務嘅毛利率差好遠：硬件毛利率35%，服務毛利率就有71%。因為生產iPhone需要物料、運輸、人工成本、供應鏈管理，每多賣一部，就要多一部嘅成本。但服務業務，當你搭建完個iOS平台，每增加1 蚊收入，所需要嘅額外成本就好細。
所以當蘋果而家面對緊硬件市場飽和、iPhone銷售倒退嘅困局之下，最近管理層向投資市場推銷嘅新增長重點就係佢嘅服務業務。
呢幾年以嚟嘅累積，蘋果硬件注册用戶已經去到20億、收費用戶都有10億。呢啲用戶流量嘅披露就係蘋果想同市場講：就算iPhone 賣得無以前咁好，但呢班忠誠嘅果粉，閒閒地每人喺iOS度洗多幾蚊，佢嘅服務收入增長就係10億計，而且利潤率高，絕對係蘋果未來整體利潤增長新動力，而佢嘅服務收入最近亦都真係連續兩季創歷史新高。
DMA法案嘅影響
但最近嘅DMA法案，最直接最攞命嘅係要求蘋果要容許iPhone用家喺第三方平台下載各類iOS嘅Apps，即係唔一定要喺蘋果AppStore下載。
雖知道而家嘅iOS Apps全部都係要由AppStore度下載，而每個App嘅下載AppStore 就會向開發商收取30%費用。但每多一個App嘅下載其實對蘋果嚟講成本好低，因為iOS、AppStore平台早已搭建，唔會有太多新增邊際成本，亦都說明點解服務業務有成70%嘅高毛利率。
但如果以後收費App嘅下載，蘋果要開放俾AppStore以外嘅其他平台，咁無人愿意再俾蘋果30%咁高嘅服務費，除非佢降低服務費水平到接近其他下載平台。
咁最直觀嘅影響就係AppStore嘅收入由以往無競爭、高利潤率，變成自我開放、擁抱競爭嘅局面。服務費收入自然會因為競爭而減少，更甚者會影響埋蘋果服務業務喺歐盟區嘅營運模式。
先唔好講呢個法案會唔會令其他國家都跟住做，但單睇蘋果歐洲分部業務佔成間公司嘅25%收入、35%經營利潤，呢個法案嘅影響都真係不可忽視，我哋要一直觀察呢年事情嘅發展，同埋蘋果有冇應對方案。
Benny Yam
執業會計師
Facebook：https://www.facebook.com/cfobenny/
Patreon: https://Patreon.com/Cfo_benny
本欄隔周三刊出
