雅虎香港財經 【大茶飯】食麵梗係食一丁（青冰）
陪伴青冰成長及睇波的食品，必定是即食麵，N年前求學時期半夜三點睇波，煮個丁麵配支可樂，爽爆，咁多年來吃咁多冇益的即食麵，都頗有心得了，但仍然鍾情丁麵，只係以前會吃香港版，自阿信屋（0759）引入日本版後便轉會，雖然係貴一截，但人老咗又唔會成日食，其實相差無幾啫，咁長的引子，大家應該估到今天要講的是日清食品（1475）。
年半前日清上市，作為超級粉絲的青冰沒有認購，當時全城都是玩新經濟，這些食品股沒甚看頭，近半年又唔同晒，阿爺主力刺激內需，4月開始的減稅降費，即食麵的增值稅由16%減至13%，係受益者，加上MSCI上周將日清加入香港小型股指數，再望吓今年的升幅及近期股價，值得睇吓。
日清去年收入33億，19億來自內地，14億來自香港，你話香港人係咪痴線呢，咁細的地方食咁多丁麵，但換句話說，內地的表現真係好一般喎。內地即食麵一哥康師傅（0322），去年來自該分部的收入有239億人仔，而統一（0220）則有84億人仔，日清拍埋去直頭係唔入流。青冰沒深入研究康師傅及統一係咪好食啲，但都幾肯定，兩者都有高低檔市場，又係地頭蟲，自然有優勢，不過過江龍日清在過去3年的銷售額，錄得近兩成增長，相反康師傅及統一只有5%及11%增幅。
近日統一及日清在首季營運數字都交出靚數，但都要留意細節位，老大哥康師傅，在今年3月宣佈，不再刊發季度業績，所以冇得比較，亦都係企業管治上的倒退，而統一呢，青冰在搵料其間，發現佢哋2017年講過會逐步退出中國即食麵市場，但在3月公佈的全年業績內，又唔見有這回事，仍然有好多新的發展，在回顧及展望都較為悲觀保守，點知首季純利增48%，你話點信得你過呢。以估值計，預測市盈率暫以日清最便宜，但近幾年增長卻是最高，所以日清今年累升35%，其餘兩位約兩成，證明市場都係識貨嘅。
食落肚嘅嘢，有能力選擇應該都係日本秤先過內地，起碼港燦係咁諗，亦希望內地都會逐漸認同吧。
