香港股市 已收市

WeWork可能係今年最伏美股IPO

.

經濟衰退陰影橫掃全球,過去一些人氣新股的「光環」,現在可能反成為趕客因素,預計最快9月上市的WeWork就係好例子。

過去趁美股大牛市上市吸金的人氣新股,「光環」通常包括品牌具知名度、燒錢雖然快但全球擴張步伐更快、每轉融資投資者反應踴躍、具有科技元素。牌面睇,知名度、全球插旗效率、吸金魅力WeWork均齊備,至於科技元素,雖然WeWork本業係收租,但因為標榜不少租客是優質科技獨角獸,令WeWork升級成為科技概念包租公。

當市旺時,WeWork 這些「光環」統統都可以是IPO賣點,但現時環球經濟呈「等爆煲」氣氛,投資者就會用「正常」眼光去審視WeWork的「光環」。首先係燒錢,WeWork燒錢速度有增無減,今年上半年再勁蝕九億,意味上市集資係前期投資者一致的跳船行動,之後WeWork繼續燒錢,就可能要靠借貸或發新股甚至供股集資,三樣小股東都唔會buy。

.

至於科技元素,一旦環球經濟衰退,獨角獸再無水喉關照,即使唔執笠都會棄守貴租的WeWork,亦可能會有人憧憬經濟吹冷鋒大企業為慳皮,會加快將工作外判,對租用共享工作間的中小微企似乎有利。但參考過去經濟衰退經驗,大企業要縮皮,裁員及削減外判開支係同步做,中小微企未必嘗到甜頭。更實際的問題係WeWork租金相對離地,須知道共享工作間租戶對品牌忠誠度並不高,邊度租平就去邊度,當環球各大城市的共享工作間出現劈租潮時,WeWork將首當其衝流失大量客戶。

對本地玩美股新手而言,WeWork上市最伏係無得抽IPO,只可以在上市後追或撈,以WeWork現在的情況,追或撈都不宜,反正美股名牌企業選擇多的是,又何必押注一隻唔湯唔水的收租股呢?

===============

精選資訊網站「中環街市」 臉書粉絲頁