【一句到微】 網店嘅大師級案例(嚴啟明)
近年無論大、小企業,甚至初出茅廬嘅年輕人,都有搞網店嘅趨勢。網店要成功,內容營銷不能缺少,請睇吓以下幾個大師級案例。
仲搵?睇片吧啦
大家網購過程有疑問嘅時候,click去「常見問題」,除咗心諗「Too long, didn’t read」之外,仲好多時搵嚟搵去都得唔到簡單直接嘅答案;想打去客服,又無人聽......呢啲情況往往會演化為消費者嘅慘慘豬回憶,變做品牌危機。但所謂「有危就有機」,專賣鬍鬚護理產品嘅美國男士美容品牌BeardBrand,就把握呢個客人嘅提問機會,定期上載YouTube教學影片,解答客人問題之餘,仲教埋點樣護理鬍鬚同介紹有關產品,設身處地解答留鬚男士困難(記住,外國男人體毛比東方人多得多)。呢啲影片形象化文字內容,又方便受眾搵到解決問題嘅方法,抵你賺啦!
精緻刊物soft-sell產品
相信各位女讀者唔會對時裝名牌Net-a-porter覺得陌生,原來佢本雜誌《The Edit》,你又睇過未?《The Edit》專為消費者提供一啲有趣嘅人物專訪,同埋時裝行業新聞。呢本雜誌入面亦都有唔少打扮指南(style guide)向讀者soft-sell自己嘅產品。當你襟落去啲產品圖片時,仲可以link去網購平台嘅產品頁面㖭。就係咁,《The Edit》為Net-a-porter帶嚟每月600萬嘅點擊率。
買衫變睇show
有時大家網上買衫,未掂過件實物,難免缺乏少少「安全感」,而令訂購有所遲疑。近年,唔少時裝網購平台就推出網上示範影片,作為產品說明嘅一部分。模特兒着住你所揀嘅衫行cat walk,唔單止過癮,仲可以將產品具體化,提升讀者嘅購買欲。美國鞋業公司Ariat網站喺應用影片示範後,營銷額立即錄得1.6倍嘅增長㖭。
內容營銷唔止係營銷策略咁簡單,仲係一個推動消費行為嘅人性化營銷概念。各位讀者,尤其是有心搞網購嘅中、小企朋友,當你哋察覺到商貿交易嘅問題,嘗試用內容營銷概念解決啦!
嚴啟明(網誌kmyim.com)—Write4U網上創意寫作平台始創人,現為《信報》及《星島日報》撰寫案例專欄。