【熱話】巴士派更系統「死機」 係因為裁走IT部?
聽聞呢個情況年初三已經發生過一次,尋日又再嚟過,早幾個月前再壞過幾次,行內巴士司機估計嚟緊情況陸續有來。
原來係講緊指派工作崗位(行車路線)及分派工作工具嘅電腦系統尋日「死機」,搞到「有車無人開、有人無車開」。
有車長就喺社交媒體踢爆今次造成死機嘅原因,據聞係因為巴士公司老細一上場,一心精簡人手,用盡晒辦法去cut走佢眼中所謂冇用嘅嘢,呢樣嘢就係電腦部喇。
喺老闆眼中,電腦部呢樣嘢又花錢、又唔等洗,於是諗到不如外判出去,咁就可以炒晒電腦部班友,之後邊樣壞先搵人整邊樣。
如是者,原本24小時on call 嘅電腦部,依家要外判公司開工先有人維修。原本新系統係巴士公司自產自銷,有咩問題可以即時跟進,但依家搵咗外人去跟,壞咗都唔太識點處理。
翻查資料,原來九巴於2016年的確曾經重組IT部門,裁走大部份人之外,甚至將部份電腦維修保養工作外判。
(圖片:有網民上載舊新聞貼圖)
最搞笑係巴士公司以為有新系統之後,就可以「精簡」人手。因為有咗電腦派更,就唔做再要派更部。
之前派更部有幾個人負責睇住啲車長拍卡「自動」攞工作崗位同車牌,但依家就算壞系統,都冇Plan B。所以結果有眼你睇啦。
有網民就認為,做得集體運輸,電腦系統先係最重要,基本上由乘客上車開始,已可以收集數據分析,邊條路線、邊段路、邊段時間最多客搭,從而調整路線,增加營運效率。
不過老闆通常唔識嘅嘢,就會覺得無用。呢句真係放喺咩情況都好啱用呀!
來源:facebook、新聞資料
===================
19網輕鬆爆料熱線,歡迎舉報老細同事19惡行,立即click入去講畀我哋知啦