婦女會取消遊行 有社運人稱陌生帳號湧現鼓勵上街

香港婦女勞工協會原定上星期日遊行爭取婦女權益，但最後突然取消，有報導話，警方曾向協會提到，擔心遊行變質，更引用社交媒體嘅帖文，而有社運人士話，突然大量陌生帳號湧入，留言要求當日上街，「迫爆修頓」，而當遊行取消之後，依啲陌生帳號就消失。 前區議員張錦雄話，喺佢轉發遊行信息之後，大量「平時從唔點讚留言嘅人湧入，紛紛話要逼爆修頓」，當中包括一個叫做黃芷晴嘅帳號，而依個帳號嘅頭像，係盜用一名澳門保險公司嘅管理層相片。多名社運人士包括梁錦威、趙恩來以及周嘉發嘅專頁都話有同樣情況。 有傳媒亦發現，一個叫做Vivian Chan嘅帳號多年來都喺建制派專頁留言撐警以及投訴前議員許智峯，但突然到多個專頁鼓勵上街，警方早前話，網上有「暴力團伙」響應遊行，而特首李家超亦都講過，如果組織唔能夠確保遊行安全，就唔應該舉辦遊行活動。