【財經TOP SEARCH】蟹貨王鐵塔「逃生門」好快閂?
【Now財經台】截至早上11點,1小時內《彭博》用戶關注度上升最多的港股,依次為中國鐵塔(00788)、閱文集團(00772)、瑞聲科技(02018)、新濠國際發展(00200)及首創置業(02868)。
鐵塔好快就會踢出國指,中興通訊(00763)就踢出科指,但兩隻股份今日都有得升,係咪反映指數身分對股價冇好處,反而畀人踢走仲好?
英皇證券銷售部副總裁林建華指,睇返過往嘅紀錄,好多股份被剔出後,股價可以拾級而上,點解仲喺指數時反而上唔到?當中有好多解釋,睇返鐵塔,過去年幾唔少坐咗艇嘅人都問,鐵塔係有機會上返1.2元水平,但同收入、盈利冇關,鐵塔最大問題係太多蟹貨,真係浸浸都有,1.5元、1.4元、1.3元、1.2元,「逃生門」可能開埋聽日,有貨都應該計一計數。