【專家分析】美團跌到呢個位先撈
【Now財經台】港股今朝跟隨外圍下挫,科網股係其中一個跌市重災區,其中美團(03690)一度再插超過8%,暫時已連跌10個交易日。
噚日上海市消保委會約美團「傾偈」,加上CEO王興疑似發帖借古詩《焚書坑》暗串當局,雖然其後已刪PO兼澄清,但大媽沽呢隻「北水愛股」一啲都唔手軟,噚日北水淨沽出64億元,其中美團佔逾37億元。
潤淼資產管理董事盧志威坦言,投資者要有心理準備科技股要繼續捱沽。雖然基本面無變,但睇返科技股近排面對嘅政策風險,加上股份本來已經係弱勢,所以就跌得咁甘。
William預期,美團或要跌到舊年3月「疫情底」,即200元水平先值得買。