【代理Secrets】樓市轉角?業主唔覺!(樓民)
最近個市唔使我樓民講,大家都有眼睇氣氛有幾差,但係有一班人對此視而不見,之唔係就係一班放緊盤嘅業主囉!佢地見放盤無反應,個個都怪樓民無做嘢。叫佢地叫價平少少,又個個都唔制。點解業主會對市況有咁大期望落差?主要係估價作怪。
雖然話入咗加息周期,事實上銀行仲有大把錢想借出去,加息都只肯加少少,同時為咗繼續做到生意,市場共識都係做估價做得鬆手啲。同時,估價係根據過往成交去估,之前市咁好,估得大都無人可以話唔啱。但古語有云,過去表現不能代表將來表現,呢個情況對轉角市嚟講尤其真實。
畀個例子大家,今年沙田第一城細單位最高做過580萬,無論銀行估價同業主期望都用呢個做指標。但現實係,過去一個月以來,準買家對叫價五字頭嘅細單位根本連睇都無興趣。如果話個單位又高層、又開揚、內櫳又靚,中到呢條三穿一,可能仲可以叫五字頭,但如果中晒,業主就覺得要叫六字頭啦係咪先?
依家樓民我真係好大壓力,唔怕沙塵講句,錢我上半年已經搵夠,真係唔係數嘅壓力,而係日日俾業主捽,又交待唔到。事實上,講事實畀業主聽已經無用,要安撫佢地,就要真係落手落腳做,例如做廣告,擺open day。如果同到個客講「黃太,我今日幫你擺咗一朝open day,都有兩個客睇過,但暫時未有feedback。」咁個客聽到都無咁嬲。但係呢啲真係預咗白做都要做,你話係咪灰?
=============================================