【魚樂無窮】陰乾市只有兩個方法贏錢（唐牛）

中國外憂未完內患又殺到，近日內地P2P平台掀起爆煲潮，火燒連環船效應下，儲戶紛紛玩撤資，預計涉及金額數以萬億元人民幣計，加上中美貿易戰沒完沒了，人民幣已進入易跌難升局面。

中國外憂未完內患又殺到，近日內地P2P平台掀起爆煲潮，火燒連環船效應下，儲戶紛紛玩撤資，預計涉及金額數以萬億元人民幣計，加上中美貿易戰沒完沒了，人民幣已進入易跌難升局面。執筆之時人仔離岸價兌美元已跌穿6.8，與2016年底烏龍破7水平越來越近。

甚麼是烏龍破7？話說根據彭博報價系統，當年12月28日在岸人民幣價兌美元曾破7算，不過，人民銀行未幾即澄清，滙價在6.95至6.9666元平穩運行，只是個別媒體進行不實報道，阿爺一個闢謠動作，人仔即見底回升。

所以，你問我人仔何時見底，最緊要都係中央出口術，講明「人民幣不存在大幅貶值空間」、「貶值屬市場行為」等等，人仔便有望喘穩。咁你即係話而家係阿爺放任貶值？劃公仔唔使劃出腸吧。

人仔一日未跌完，港股都難以有運行，當股市出現陰乾式下跌，贏錢只得兩個方法。第一，做淡。但炒股票嘅人，總愛買升不愛買跌，受惠嘅只有少數；第二，買公用股避險，君不見中電（002）、煤氣（003）日日創新高嗎？

「喂，博反彈都可以贏錢喎！」你check番近排嘅trade，贏錢比例係幾多？真係贏到錢？冇乜嘢都係忍手吧。

唐牛fb專頁
http://www.fb.com/tongcow88