雅虎香港財經 爆一爆｜一股得道 台灣升天（Louise）
Nvidia 嘅創辦人黃仁勳在台灣嘅「騷」，令全球投資界眼球聚焦到台灣，學嘢喇，咁先至係「說好故事」，都話成功人士是最叻嘅「推銷員」，誠哥年輕創業時都係做行街仔 sell 塑膠水桶呢。
美股外幣即時報價 多國新聞任睇
黃仁勳邊洗碗邊諗計創業
黃仁勳自細係美國受教育，講故仔能力了得，而且夠哂自信、又有幽默感好睇過棟篤笑； 呢份嘅自信心在香港富二代係搵唔到，呢啲就係有血汗嘅錢同冇血汗嘅錢之別。
九歲被老豆送去美國讀書嘅台南仔黃仁勳，曾跟住阿哥係連鎖快餐店 Denny's 做洗碗揾外快，創業時同兩個窮小子就喺 Denny's 買杯咖啡傾創業，不斷免費添飲至餐廳打烊，最PK嘅時候幸得到台積電（TSMC) 老闆張忠謀睇得上，係事業上扶過他一把；到今日 Nvidia 同埋台積電都成為明星股。
識講故事可印銀紙
所以識得 storytelling 真係可以印銀紙，所有科技股條攤路如是，有故講就有資金追逐，水漲船高再拆細，搞到師奶都湧入去，公司不斷發認股權證俾員工，黃仁勳娶埋鬼婆做老婆，等於貼埋老 label 係佢身上，合哂基金佬何車。
睇住黃仁勳做騷嘅片，就諗起本來同樣「吹得」嘅阿里巴巴創辦人馬雲，只不過時不與佢就要變鵪鶉，以前馬雲一出現 fans 擁上前拍照，現時佢在香港不時現身愉景灣高爾夫球會，身邊仲有個貌似保鏢或是保安人員，fans 見到都唔夠膽行埋去集郵，可見「推銷員巳死」。
馬雲故事本來都動聽
馬雲嘅故仔本來都好動聽。杭州英文教師在西湖做老外導遊兼練下英文，認識到一對澳洲夫婦支持佢讀書。馬雲創業時有 18 位合伙人稱之為「18羅漢」，馬雲同鬼佬如 Donald Trump 打交道都十分自如，阿里巴巴亦吸引到外資如 Softbank 落叠。
不過馬雲始終唔喺美國受教育，又唔係IT 底，唔似黃仁勳嗰份美國 tech 佬對科技創意的執着。所以馬雲都安排仔女去史丹福大學讀書，最近濶太圈傳來網易（9999.HK）老細丁磊，捐左3億美金予史丹福大學，當然亦為仔女鋪路，而長實主席李澤鉅個孻仔李長根（Michael)，入咗以美國嘅賓州大學（University of Pennsylvania )，有錢佬有財又有網絡，又點會唔識貨呢？
