雅虎香港財經 【大茶飯】神話破滅 未必壞事（青冰）
作為港股的投資者，過去一星期的確係驚心動魄，當大家深信騰訊(0700.HK )之跌，全因指數基金被逼沽貨，點知佢愈跌愈有，每天十蚊，低見365.20，高位回調16%，所有最堅實的「訊」徒，肯定震過貓王，最開心的肯定係嗰啲覺得騰訊超貴而沒有參與過的大師們。雖然低位反彈咗唔少，但都向股民發出了警惕，長升不跌的神話隨時告終。
青冰在專頁都提過，現時的騰訊好像往日誠哥的和黃，好多分析員都想用基本面拆解其真正價值，但這個王國近年的投資極多，可分拆的項目不少，咁其實係好難拆解嘅，最容易令人理解的始終係《王者榮耀》及近期的吃雞手遊，又或者係廣告收入，不過用個啲去計，現價一定瘋狂啦。現時都近年尾，相信股王要抖抖喇，再創新高或爆煲，相信只會發生在2018年。
今年另一個神話板塊，手機股，局勢似乎較明朗。瑞聲(2018.HK)及舜宇(2382.HK)兩大龍頭，分別從高位下挫26%及30%，如果再睇埋台灣的鴻海及大立光電，都係跌25%及30%，相信未必需要做一個詳細的行業分析，都大概聞到有燶味。瑞聲及舜宇係增長股的代表人物，只要增長有些少減慢，相信已經唔值現時的估值，至於其他二線啲的手機股，恕青冰無能力逐一點評了，但只要大阿哥估值下調，其他股份炒re-rating的空間就更窄吧。
睇到呢度，發現青冰都幾淡喎，其實又唔係嘅，今年的主調，都係集中炒個堆股，大漲小回炒完又炒，如果資金真係撤離，流向其他行業，尤其係工業股，實屬好事，起碼令各位(包括青冰)都會更用心做下功課，發掘好股。
近期熱話當然係證監打大老虎啦，想食花生的戰友，可以每天追看報紙，而青冰卻記得，中證監曾經說過，如果老千股問題處理不好，滬深港通不會再擴大，換言之，港股通擴展至全部股份，並非不可能。下年六月係A股被納入MSCI的大日子，滬深港通會唔會再適時做野呢？但願如此啦，咁正氣的工業股又可抬頭了。
Fb個人專頁 http://www.fb.com/chingbing888
