【我係邪惡HR】HR的聖誕是這樣過的(HR小薯蓉)
到左年尾,好多行業都開始準備收爐,大家都慢慢開始進入holiday mood狀態,返工想即刻放工,迎接普世shopping嘅聖誕節。
年尾人們轉工意欲下降,公司辭職嘅人數少左,空缺少左,招聘嘅需求亦自然低咗。你可能覺得咁嘅情況下,HR嘅工作量理應係會減少,然後可以日日坐喺公司食花生等收工,聖誕真真正正做個別人口中又廢又冇嘢做嘅HR。
太天真喇,食花生等收工幾時輪到HR?HR的聖誕應該是這樣過的。
1.準備聖誕Party
年底聖誕節,全公司上上下下都好期待攪返個聖誕party開心下。當然每間公司負責嘅攪手都有機會唔同,不過好多時負責員工福利嘅HR同事都會需要參與其中。由宣傳、佈置、諗遊戲、訂嘢食、買禮物、做司儀通通都要做,保證去到平安夜之前都冇得hea。
2.準備出花紅
做咗成年咁辛苦,人人都想年尾收到公司大大份花紅。花紅筆錢唔係喺電腦㩒幾個掣,就會由公司個戶口自動轉入去同事戶口,係要由HR計清楚條數先可以交畀銀行過數。全公司咁多人,唔係人人花紅條數都一樣,有人有得出亦有人冇,有人出多啲又有人出少啲。為咗要確保大家過個肥年,當其他人準時收工,HR payroll同事要通宵辦公;聖誕當日其他人出街食火雞,佢地分分鐘聖誕要留守喺公司叫麥樂雞。
3.計劃來年請人大計
年頭又會喺轉工嘅旺季,做HR嘅都預咗每年派完花紅會出現turnover,只係差在多與少。除咗要應付turnover,更加要配合公司來年大計去計劃人事招聘政策。點樣請人、參加咩招聘會、攪幾多場講座⋯⋯全部都要計劃定。以為淡季可以停一停抖一抖?唔好太天真喇。
HR的聖誕是這樣過的。