【樓市贏家】睇樓要在暴雨天(徐峰)
近日天氣時晴時雨,更不時有黃雨紅雨,令人放假最想做的事,就是躲在冷氣房內懶洋洋的煲戲打機或者打下牌,不過,若然你是有心要租樓或者買樓,就千萬唔好錯過這個睇樓良機,因為,橫風橫雨的日子,正是見真章的時候。
其實,好多朋友睇樓,都會選擇風和日麗的時候,貪行出行入都不用成身雨水或汗水,但這是一個大錯特錯的事。跟大家分享一位朋友的慘事,這位朋友大約半年前租層樓,是一個單幢式洋樓,樓齡都有咁上下,當時業主已經把單位翻新,佢睇樓時都對單位十分滿意,即時租下。
當他正式搬入單位之後,跟隔離鄰舍開始溝通,已經有人提醒佢,幢樓漏水情況都幾嚴重,這位朋友都即時向地產代理提出疑問,但這名代理就說無聽過有客人投訴過。不過,過多三、四個月,這位朋友開始發覺唔多對路,雖然油漆只係油了幾個月,但已經開始有裂痕,佢就想起當時鄰居同佢講大廈漏水的情況,並即時打俾業主,業主只回覆說這是新油漆冷縮熱漲出現時裂痕。
不過,幾日後,天降豪雨,天文台更掛上黑雨,當這位朋友下班回家,甫開門即時「O曬嘴」,大廳一列窗上的橫樑已全面滲水,更有油漆剝落,而地面呢?成地水之餘,牆角的電掣,連帶貓廁所入面的貓砂都是水,陰功!
這位朋友即時打俾業主,結果如何,除了這名租客,相信對大家都不大重要。但這位朋友就相當後悔,因為租樓當時,已經有地產相關行業的朋友,提醒他租舊樓要注意漏水的情況,特別是經過翻新的單位,因現時不少業主都會把單位「化妝」後出租,即是話,就算有重新油漆,都只是油上一層新油,以遮蓋牆身裂紋、水漬,而非真正把單位進行維修,一個雨季就可以把單位情況打回原形,就等同用水可以把一名濃妝美女毀容一樣。
其實,這名朋友已經算好彩,相信不少人都還記得,早兩個月就是一場黃雨,令到紅磡一幢唐樓發生露台倒塌事件,凌晨時份一個3米乘7米的石屎露台突然塌下。如果想租一層平靚正而又安全的舊樓,落大雨睇樓這種少少苦楚又算甚麼,有個安樂窩最緊要。