【發下夢】中了金多寶點搓實啲錢!?
2018年首個奇蹟唔係亞視復活,而係金多寶連續兩期無人中,令星期四晚獎金衝上1.1億元高位。上班族中午買飯完再排隊買獎券之餘,又不妨發個夢,諗下中獎可以點投資。
中獎勿忘何東家訓
外國有不少文章教上班族中獎後如何理財,實戰理論可以很仔細,但大原則其實很簡單,只須要牢記本地初代富豪何東家訓:「一要勤力,二要銀紙在手搓到實,千祈唔好跣手!」
參考此家訓,聰明的你都知道中獎後劈炮豪遊世界大宴親朋係大忌,相反,最好將中獎消息保密維持低調,份工唔算難頂的話就繼續返工,待心情冷靜後再思考點樣「搓實」獎金。
從過去超級金多寶不時會有多注中的往績推論,今次你幸運中獎,可能「只」瓜分到三、四千萬獎金,就當你分享到四千萬吧。要令這四千萬唔好「跣手」,用來創業或炒股炒Coin都是下策,上策是押注可以提供「被動式收入」的資產。
評估個人魄力
「被動式收入」資產,聽起來似乎具有唔使理、到時到候就貢獻收入的功能。但部分「被動式收入」資產頗考投資者的管理魄力,最簡單例子係買樓收租,由物業保養、收租追租到拆解租客糾紛,都是一門消耗魄力智慧的任務。
不過香港地物業有價,有四千萬在手,你仍可能會優先考慮用來置業,特別是尚未上車的朋友。然而要留心入手豪宅自住忽然富貴有違保持低調原則,平衡之道是購入較平實的物業解決居住問題,又或利用租金收入租屋住。後者好處是你毋須急於選定自住物業目標,可以再觀察樓市多一會才決定拍板。
至於選擇收租資產,便應按個人魄力去考慮。自問願意投入心力管理租務的話,除了買住宅物業放租,想簡單一點,可選擇投資車位,本地車位追不上私家車增長速度是結構性問題,在車位較渴市地區入手數個車位,即可以邊收租邊等待沽貨收割機會。
除了不動產,經歷網約車襲港一役,的士小巴又再次證明其市場護城河有多堅固。現時入手市區的士牌入場費610萬元,小巴牌近期更跌至400萬元。不過經營綠Van企業可以透過換19座新車增加載客量,缺乏誘因收購紅Van,以貨比貨,押注市區的士牌無疑較吸引,並可以交由車行代為收租及管理。
已擁有自住物業,又想保持低調及減少投資壓力的朋友,則可以回歸基本步,選擇最簡單的高息股。就以最正路的中電為例,斥資一千萬鬆啲入手126500股,按去年派息紀錄,一年收息361790元,除開每月就有三萬元收入,有了股息收入作後盾,你便可以放鬆心情享受工作。
當然以上分析停留在發夢層面,一日未中獎,你必須要回到現實,身體力行實踐何東家訓,有限錢更加不能大意「跣手」。