【股劃有道】桂林街美食車（畢氏財演）

睇畢整份財政預算案，大部份都係舊酒新瓶，新意欠奉，最吸引我眼球的，是美食車(FOOD TRUCK) 呢一個概念。新聞引述消息人士指，美食車概念源於外國流行電影，每輛美食車售賣食物種類須為高質素，強調「唔係手推車賣魚蛋嗰種！」，而係一項旅遊業產物。設計或參考北美售賣熱狗的餐車，每輛美食車投資估計達六至七位數字。

(1)    首先強調為高級餐飲，但係財爺其後又補鑊表示可以賣魚蛋、牛雜等等，即係點？唔通係「高級魚蛋檔」？要賣黑松露咖哩魚蛋配中產身份象徵的咖啡？

(2)    其實我唔係好明｢美食車」同｢美食木頭車」(WOODEN FOOD TRUCK)的分別，大家都係車，大家都係賣美食，如果規管得好的話，我相信街邊木頭車都可以合乎尺寸、通風、防火、去水及衞生問題等規格；管理得差的話美食車都可以引起阻街、擾民等的問題。兩者的差異可能主要為部車有引擎和沒有引擎，美食車走鬼可以走快啲。

今次美食車的建議同埋之前財爺話中產係要睇法國電影同埋飲美式咖啡，現在的高官們給我一種十分崇洋的感覺。相信財爺會喜歡一條泊滿賣熱狗、PIZZA美食車的桂林街，多於一條充滿賣港式雞蛋仔、魚蛋小販的桂林街。好彩賀歲片「十二金鴨」無喺外國上影，如果唔係，分分鐘會鼓勵舞男 (GIGOLO)呢一個行業在港發展。

正所謂鹹魚清菜各有所好，美食車和木頭車在本質上沒有高低，但我認為問題在於美食車的入行門檻或許太高，約七位數字的入行成本，可以預見美食車又將成為大財團如大家樂，大快活等的囊中物，變成流動快餐店，到時賣的又是連銷店食物，打擊傳統街邊小食的生意，失去了推動旅遊業的本意。

參考大家樂及大快活的股本回報(ROE)，投資回報(ROI)應達20%方為合理水平，以入行門檻為100萬元計，每年淨利潤應達20萬元，即每月約1.7萬元，如每天開鋪10小時，三名員工時薪40元計，人工成本每月3.6萬元，假設其他雜費 (汽車維修、保險、油費、牌費等) 每月1萬元，每月毛利應有6.3萬元。以大家樂及大快活毛利率約13%計算，美食車每月營業額應達48萬元，假設每串魚蛋賣10元，每月要賣出4.8萬串，每小時要賣出160串才能達到合理利潤水平，怪不得政府說要賣高檔美食了。