【魚樂無窮】牛市拉近人與人的距離(唐牛)
香港人投資範圍狹窄,唔係股就係樓,而家兩樣都升到啪啪聲,經常掛在口邊實在不足為奇。
股市暢旺,除了令荷包腫脹外,人與人之間的聯繫亦變得更緊密。你自己想想,在街上撞到朋友,除噓寒問暖外,係咪會問對方有冇好冧巴、有冇抽新股?你有炒開股票嘅,相信會收到十年不見朋友的whatsapp,hi完之後就入正題問冧巴,止賺止蝕價等等。最近去了一個上市公司飯局,一連串公司介紹及Q&A後,最後竟然有管理層畀股票貼士,真心覺得正。冇計,香港人投資範圍狹窄,唔係股就係樓,而家兩樣都升到啪啪聲,經常掛在口邊實在不足為奇。
近排GO股可謂冰火兩重天,獲股壇猛人高振順入主的品牌中國(0863.hk),兩日狂升1.5倍,名牌效應無限發酵。相反,廣州基金做大股東的勤達(1172.hk),GO完成後迅速潛水,四日唔見兩成,雖說跌幅不算太大,但牛市要輸錢,始終心有不甘。今日GO將截止的鎮科(0859.hk)亦坐過山車,早段炒高半成後,竟然倒跌13%,其後又收復失地,埋單最終跌3仙,失守GO價。在此不厭其煩講多句,GO股跌穿GO價可以萬劫不復,就算十萬個不願意,也要嚴守止蝕。
由於T+2關係,券商多在截止前兩至三天,便會要求股東決定是否接納要約,所以截止前一天會出現真空期,股價例牌會有異動,昨日鎮科便是最好例子,博GO股炒上的戰友務必要留意,否則隨時會得不償失。
唐牛fb專頁:http://www.fb.com/tongcow88