【Hea富Startup】你要識分何謂創業優勢（郭釗）

上期以《延禧攻略》為喻，談及地圖炮式營銷為大財團所用最有效之佔領市場方法。如果由零開始小本經營，又應該怎做呢？很多第一次做生意的人，多數以自己的經驗及數據來判斷成功機率。例如我有個朋友好鍾意玩玩具，他了解下發現賣玩具原來有三至四成利潤，而咁橋又給他聯絡到分銷商，突然覺這門生意做得過。

既是興趣，（自以為）十分熟悉市場，只要找個專賣玩具的商場，例如油麻地的舊中橋國貨原址「現時點」，一間中型舖的租金只是萬零兩萬蚊，他本身有幾十萬積蓄，心諗應該有能力做得來，天時地利人和齊晒（他認為） ，唔開擋等幾時。

開檔前他走來問我意見，我只問他一個問題，如果答得到，開檔無妨。他興致勃勃說：「冇問題，我諗得咁周長，你即管問！」我問：「你同隔離嗰間玩具舖有咩分別？」 他呆咗一呆，然後一輪嘴答我一大堆內容，例如「我本身做開設計，會令到舖頭設計得好靚」、「我會專入某個牌子嘅Iron man玩具嚟做一間特色專門店，令所有狂迷都嚟我鋪頭幫襯」……

我跟他解釋：「你個舖頭豆腐潤咁細，所有設計特色都會俾啲貨遮住晒，呢個唔係優。Iron man只係玩具角色嘅其中一種，做專門店可以，但就失去咗更高利潤嘅產品，而且呢個潮流可能會慢慢冷卻，到時候你就會轉其他產品。呢個諗法只你係你一廂情願，鍾意唔代表有得做，正如投資，鍾意嗰個地方唔代表有投資價值一樣。」

優勢是，貨源特別平，產品特別靚，只是你攞到，其他人攞唔到，或者間舖是租親戚租給你，租金平人一截，別人要賺三成先至為到皮，你賺半成都能夠運作，更甚者你有獨門經營秘訣，而且驗證成功過。要在同行中跑出就要做不同，所謂的不同，例如八、九十年代樂壇是以情歌為主，有隊成功跑出的組合，紅到而家叫軟硬天師，他們當時用無厘頭得來，言之有物的歌詞，配合當時沒人使用的rap唱法，成功突圍而出，令一眾追求新事物，不甘隨波逐流著重自我的年輕人追隨， 他們當時效力的商業電台，所提倡的口號正是「人做我唔做，殺出新血路」，到現在都值得創業者借鑒。我的想法係：無錢，就用多啲腦啦。

郭釗（著有《HEA富學：一天只做2小時的創富方程式》）

https://www.facebook.com/heaology.edu