雅虎香港財經 嘈老闆IG｜市場力量解決社會問題｜曹參國
人大政協兩會閉幕，好多人都話冇乜驚喜政策措施，但係其實今次好幾個領導人嘅發言都重新肯定民營企業嘅功能，仲話會努力配合民企發展，呢個訊息已經夠晒市場去興奮好一段時間，諗吓有咩發展空間。
其實劉鶴早喺達沃斯論壇已經向全世界嘅金融大佬話，中國要全面支持民間企業，仲肯定民企對中國發展貢獻良多。睇返香港更加多實實在在嘅例子，最難搞嘅房屋問題，咪一直就係由民間商業機構配合政府措施，幾十年來提供私人房屋供應，而家仲幫手起埋公營房屋。
好似香港聯合船塢集團HUD向城規會遞交申請，修訂喺青衣分區計劃大綱，計劃喺19.9公頃私人同政府閒置土地，合共起約10,370個私人住宅單位及約4,700個公共房屋單位，真係成個當年嘅黃埔花園咁樣再起多次，仲幫手解決埋公共房屋不足嘅問題。
想當年黃埔花園咪就係中產階級上車嘅首選，本身係黃埔船塢搬咗去青衣，成個黃埔花園就由零開始起咗88座樓，到今日睇返成個規劃又有和黃公園，仲起埋五星級酒店，連江澤民嚟香港嘅時候都選擇喺度住，帶旺晒成個區。呢啲規劃概念咪就係民間機構嘅靈活變通，識得協調唔同嘅擅長領域，創造更加多商業機會嘅同時，提高市民嘅生活質素。
好似呢次申請包括將政府用嚟養蚊嘅土地活化，如果唔係有私人發展帶動附近嘅基建，呢一類官方閒置土地隨時又放多10多20年都唔會有樓喺度。而且民間企業有效率，節省成本，比起由政府官僚主導嘅規劃，發展速度一定更加快，可能大家仲拗緊交椅洲要點填海嘅時候，呢度已經可以住人。
我嘈老闆覺得最驚喜嘅呢個規劃係有遊艇會嘅構思，而家成日話要搶人材，人材就最想要放假嘅時候好方便咁遊山玩水，香港有300幾個離島，但係泊遊艇嘅地方就好唔夠，連埋遊艇買賣、管理、維修同營運，根本可以發展另一個高端產業。早排有朋友就請咗我去遊船河，係一隻46米長嘅遼寧製造富豪遊艇，真係行去洗手間都迷路，嘆住杯貴州出產嘅「閃閃酒」，乜嘢大刁都傾得成。
曹參國
註：專欄作家言論不代表本網立場
