雅虎香港財經 嘈老闆IG｜熊貓好，地產好，香港先會好！｜曹參國
啲世界排名成日話香港樓價有幾貴，連施永青都忍唔住寫咗篇文解釋，呢啲研究根本就冇計算香港嘅資助房屋補貼，平均嚟計其實香港人居住嘅成本並無嗰啲統計講到咁恐怖。但係地產要好，就唔係送兩隻熊貓嚟到就可以即刻返生，反而而家政府賣地冇人吼，呢個問題已經去到白熱化嘅地步。
究竟賣地情況有幾差呢？正常嚟計一季政府賣地要有幾百億收入，先至能夠頂住成年嘅政府開支。咁今年新一個財政年度第一季嘅政府賣地收入係幾多呢？答案係一億八千萬。咁如果用呢個數乘四，全年真係得十億八億買地收入，香港下年嘅政府財政赤字就會有幾千億。
而家買地表上邊較為有規模嘅係元朗一幅多用途工業地，啱啱先至話要將投標日期延長半年，即係冇人吼啦。呢一類土地政府加加埋埋好多條款落去，又要安置棕地作業者，如果市場能夠真係有自負盈虧到嘅需要，一早起咗呢一類建築物啦，所以啲官僚有時將明明值錢嘅地變成要做蝕本生意，你就唔好怨地產商唔投地啦。
其實呢一屆政府要收拾疫情嘅尾巴，要做靚盤數確實係好艱難，但係全世界嘅政府面對財政赤字都只有一招就係削減公務員開支。因為公務員規模縮細少少，個社會都冇話運作唔到，再加上失業率咁低，唔做公務員都大把嘢做。本來削減公務員嘅規模可以分開幾年做，慳咗嘅薪酬開支，可以頂多幾年。但係而家只係話今年每個政府部門減1%嘅開支，減咗嘅錢仲要擺番落去繼續喺唔同地方使錢。
中央政府喺香港回歸送大禮，大家好高興咁建議嚟緊兩隻熊貓嘅名。我同啲老友放假就上咗山頂嘅雍雅山房，懷緬一下喺沙田雍雅山房嘅時代，出晒名嘅豆腐、乳鴿同埋乾炒牛河，都有返當年嘅風味，但係個風景就由吐露港變成為維多利亞港，而雍雅山房喺沙田嘅地都變咗做地產項目，咁呢個係香港發展嚟講無可厚非，粵語長片都變咗短視頻啦。我哋一班口痕友，當然建議新來嘅熊貓應該叫「地地」同埋「產產」，咁先至叫做反映香港成功嘅特色。
而且熊貓唔一定放喺海洋公園，隔離澳門兩代嘅開開心心都係放喺郊野公園旁邊，免費俾遊客參觀。「地地」同埋「產產」應該放喺中環地王裏邊，地產商喺疫情嘅時候投咗幾百億撐住香港。而家應該襯埋個室內水族館，平平哋吸引嚟睇維港夜景嘅旅客，海洋公園鍾意管理嘅話可以繼續做管理者，咁樣先至叫做係食腦嘅雙贏方案。
曹參國
註：專欄作家言論不代表本網立場
