雅虎香港財經 【大回帶】鄧萃雯被指介入麥潔文婚姻 江華：無後悔當日咁做
最近麥潔文因為言論而被網友翻舊帳，重提多年前老公江華同鄧萃雯嘅轇轕。到底係咩一回事？
1996年1月，鄧萃雯轉投亞視，參演劇集《我和春天有個約會》，當時有傳雯女同劇集男主角江華撻著，被記者影到多次出入雯女香閨，而江華妻子麥潔文當時正在懷孕。事件曝光後惹來全城迴響，三方齊齊「解畫」澄清冇事發生，點知事隔幾個月先至入戲肉！
同年6月﹐鄧萃雯向傳媒聲稱收到電話騷擾，矛頭直指麥潔文。麥不甘示弱，拉埋江華上TVB嘅《城市追擊》，力數雯女借老公做宣傳，又爆雯女喺《我和春天有個約會》宣傳活動上主動撩江華，暗寸雯女求愛不遂。鄧萃雯都作出反擊，拎出一封字跡同麥潔文相似嘅匿名信。雙方都火氣十足，又話要告對方誹謗，但係無晒下文。
事情告一段落，鄧萃雯重返無線，憑《金枝慾孽》如妃一角升呢，之後再以《巾幗梟雄》系列兩奪視后。而江華轉投無線，一度憑《九五至尊》、《尋秦記》、《西遊記》等劇集成為一線小生，但係2006年約滿唔再續約淡出娛圈，由信佛變成信基督教，而麥潔文就靠教唱歌撐起頭家。
鄧萃雯2009年喺《志雲飯局》上提到試過戀上有婦之夫，解釋當年唔係要破壞人地婚姻，只係以為自己先係對方真正另一半，可惜最後變到反目無情，成為人生中唯一後悔嘅關係。當時有記者搵麥潔文回應，佢話欣賞鄧萃雯修補同認錯，仲承認當時有嬲雯女。幾年後江華接受訪問，直言對當年嘅事「唔後悔」，亦無對鄧萃雯感到愧疚。
2013年，鄧萃雯有份嘅《金枝慾孽貳》收視麻麻，雯女炮轟劇組「飛紙仔」（臨場出劇本）令演員難以投入。有記者搵江華回應，佢就力撐雯女批評TVB並冇惡意，因此觸動麥潔文喺facebook出post話「江華關心鄧萃雯是被動的，江華關心麥潔文是主動的」，好大陣酸味！
