雅虎香港財經 大茶飯│美股拆細必炒命中率低（青冰）
NVDA季績再超預期，對前景繼續樂觀，公司同時宣佈，將股份一拆十，稱會更便利投資者及員工。每當大型科技公司因強勁走勢而變得貴價，入場費愈來愈高，很多時候就會將股份拆細，而本港的投資者有既定的炒作思維，認為股份拆細必炒。
美股外幣即時報價 多國新聞任睇
美國股王拆細關鍵原因
股價太高入場費自然貴，這個的確有礙普羅投資者參與，所以每當大型公司股價強勁了一段長時間，升到幾百蚊，甚至一千蚊時，很多時會選擇拆細股份，令更多投資者夠本入場。如果戰友認同這一點，相信是長期習慣在港股市場打滾，所以覺得理所當然。但想深一層，所謂入場費雖跟股價有關，但跟每手股數有更大關係，在港股市場的確有這問題，比亞迪（1211.HK）股價是211.6元，每手是500股，入場費就逾十萬元，的確幾貴。之但係，大家都知美股沒手數可言，你可以用1,000美元買一股NVDA，咁都係7800港元，跟比亞迪的入場費完全無得比。不過，當你有玩開美股期權，就知道1手期權等於100股，以NVDA為例，1手1000蚊行使價的期權，等值已是78萬港元的正股，以這個角度看，入場費的確係幾貴，所以有理由相信，拆細都係想衍生工具市場流通性增加，令散戶及莊家更易操作。
喪炒機會五五波
股王將股份拆細，即時令青冰想起TSLA曾在疫情時兩度拆細，2020年那次在8月初宣佈，8月尾生效，當時股價由100美元起步，生效時炒到148美元，升幅的確驚人，真係逢拆細必炒喎，不過第二次拆細發生在2022年8月，同樣是月初公佈，月尾生效，公佈時股價288美元，生效時297美元，效果不明顯。其他科技巨頭如AMZN，在2022年3月拆細，6月初生效，公佈時是139美元，生效時是122美元，GOOG在2022年1月初公佈拆細，7月生效，股價分別是129美元及112美元，翻查記錄，近十年兩度拆細的AAPL，就生得逢時，在2014年及2020年拆細都錄得顯著升幅。所謂拆細必炒，似乎只是傳說，並非次次有效。
散戶投資者都有一個慣性，寧願將往績定律化形象化，減省時間而不去對個股進行深入研究，想衝股王又見到累升咁多，自然要搵個理由壯吓膽，之不過以上的小統計睇到，命中率也只是50/50，衝入場前宜三思呀。
青冰
http://www.fb.com/chingbing888
本欄逢周五刊出
