太唔是何|呢間「銀行」每年賺到錢 都會分啲俾存戶|400歲人瑞
人瑞最近留意到有間「銀行」有個幾特別嘅舉動:呢間「銀行」每年賺到錢,都會撥一部分嚟派俾存戶。即係點?即係作為存戶,除咗收到戶口利息之外,每年仲會收到「花紅」囉!今年就會收到£100!有冇咁「着數」?一齊嚟睇下有冇伏!
要用引號框住「銀行」兩個字,因為嚴格上嚟講呢間只係金融機構,但佢會提供一般銀行服務,包括往來戶口、儲蓄戶口、按揭、貸款、信用卡、保險等等。佢全名就叫Nationwide Building Society,在街上不難見到呢間「銀行」嘅分行。
Nationwide稱呼客戶為佢哋嘅「會員」,做「會員」其中一項福利,就係有機會合資格成為領取「花紅」嘅一分子!
咁乜嘢叫做「合資格」呢?按佢哋網站推廣頁面嘅解釋,就係喺今年3月底時,至少要有一個「往來戶口」,再加多個合資格嘅「儲蓄戶口」或合資格嘅按揭。咁Nationwide就會喺今年6月13至28日期間,發「花紅」俾合資格嘅「會員」嘞!
網站表面上就寫到咁鬼容易,但打開個T&C就會發現魔鬼在細節,即係唔係開戶口就有資格領取「花紅」咁簡單。除咗要喺指定日子之前開齊指定戶口之外,仲要存入指定金額嘅款項(至少£500)及完成指定數量嘅支付交易等等。人瑞睇過啲金額同交易要求,其實就唔難達到嘅,都係幾百鎊同埋幾次咁,但係就煩囉。
除咗「花紅」之外,仲有咩「會員福利」?又據佢哋網站介紹,仲有會員限定的儲蓄戶口、信用卡、貸款服務,又有利率升跌提示、轉按優惠、分行服務等等。唔⋯⋯好似同一般銀行差唔多啫。但今年就新加兩項「福利」:1) 18個月5.5厘嘅定期儲蓄戶口,存款上限為£10,000,即18個月後可賺利息£825;2) 將往來戶口轉至Nationwide,並加入兩項自動轉帳,就可以得到£200獎賞。
值唔值得加入做「會員」,博取明年賺「花紅」呢?睇返市場上對派「花紅」嘅反應,就略知一二:據媒體報道,今年有超過300萬名會員獲得花紅,但銀行有1,500萬名會員喎!咁即係有大約1,200萬名會員落空!(可能佢哋未夠資格呢)
據報道,呢1,200萬名憤怒嘅會員當中,部分人已去信Nationwide及監管機構FOS表達不滿。
金融監管機構FOS回覆:投訴「盈利分派」這種活動,並不是我們管轄範圍。完。
至於Nationwide嘅回覆更有趣:如果您一心諗住今年有得攞「花紅」但最後發現原來是沒有,我哋Sorry囉!
留意雖然Nationwide會有分派盈利俾會員嘅「習俗」,但每年嘅合資格條件都未必一樣,Nationwide嘅一般戶口息率亦不特別吸引。您會博佢下年分派盈利俾您,定係出去搵過第二間銀行戶口賺取更高息率?仲有一點,攞咗呢£100「花紅」,都係要當利息收入繳稅的!
Nationwide 網頁參考:https://www.nationwide.co.uk/about-us/fairer-share/
400歲人瑞 —— 40幾歲中年漢被同事嘲笑是400歲人瑞,結果憤而出走鼓起勇氣探索英倫新世界(沒有啦!我和同事關係很好⋯⋯至少我自己是這樣認為)。在重新適應異地生活的過程中,尋找他鄉生活的技巧與生存的態度。從第一身視角分享人性的矛盾、制度的差異、文化的衝擊,真實揭露財富是如何一點一滴積累,以及真人倒錢落海的經驗⋯⋯
本欄〈太唔是何〉逢周五登場,旨在分享筆者在英國日常生活體驗,給各位多一個生活參考,相關分享不存在實用資訊(抱歉!),只反映在當時情況下,筆者遇到的真實情況紀錄,大家可以當係故仔聽,參考一下。
留言、給讚、追蹤、分享,請往Facebook專頁:https://www.facebook.com/thames400